21.01.2026 | 23:30
Ինչ իրավիճակ է Հայաստանի ճանապարհներին և Լարսում
Հայտնի է «Սուրբ Գրիգոր Լուսավորիչ» ԲԿ-ում պայթյունի հետևանքով զոհվածի անունը
Հասարակություն
25.09.2018 | 14:28
Հայտնի է «Սուրբ Գրիգոր Լուսավորիչ» բժշկական կենտրոնում այսօր՝ սեպտեմբերի 25-ին թթվածնի արտադրամասում տեղի ունեցած պայթյունի հետևանքով զոհվածի անունը. նա արտադրամասի 40-ամյա աշխատակից Վահրամ Գասպարյանն է:
Այս մասին Factor.am-ին հայտնեց բուժկենտրոնի տնօրենի ժամանակավոր պաշտոնակատար Արման Հովակիմյանը։
Հովակիմյանի տեղեկացմամբ՝ պայթյունի հետևանքով ևս մեկ աշխատակից վնասվածք է ստացել դեմքի շրջանում. նա նույն բուժկենտրոնի վերակենդանացման բաժանմունքում է: Բուժհաստատության տնօրենի պաշտոնակատարը նաև վստահեցրեց, որ հիվանդանոցի թթվածնի կայանը հուլիսին փորձաքննություն է անցել, դրական եզրակացություն է ստացել:
Բացի այդ՝ կայանի բոլոր աշխատակիցները հավաստագիր ունեն, որ կարող են աշխատել այդ կայանում:
Առողջապահության նախարարի խոսնակ Լիանա Եղիազարյանն էլ Factor.am-ին տեղեկացրել էր, որ պայթած գազաբալոնը հիվանդանոցի թթվածնի կայանինը չէ, դրսից է բերվել: Այս տեղեկություններն արդեն փոխանցվել են իրավապահներին, ոստիկանությունը փորձում է պարզել կատարվածի հանգամանքները, մասնավորապես այն, թե ինչպես է գազի բալոնը հայտնվել հիվանդանոցի կայանում:
ԲԿ-ի տնօրենի պաշտոնակատարը հաստատեց, որ պայթած գազաբալոնը հիվանդանոցին չի պատկանել, սակայն դժվարացավ նշել, թե ինչ ճանապարհով է այն կայանում հայտնվել:
