10.08.2026 | 10:03
4 խաղափուլից հետո երեք հայ շախմատիստ առաջատարների շարքում է. Եվրոպայի Մ20 առաջնություն
Իրանի ու Թուրքիայի ԱԳ նախարարները հեռախոսազրույց են ունեցել
Քաղաքականություն
24.01.2025 | 11:06
Իրանի ԱԳ նախարար Սեյեդ Աբբաս Արաղչին ու Թուրքիայի ԱԳ նախարար Հաքան Ֆիդանը հեռախոսազրույց են ունեցել։ Իրանական Mehr գործակալության հաղորդմամբ՝ կողմերը մտքեր են փոխանակել երկկողմ հարաբերություններին և Սիրիայում տեղի ունեցող զարգացումներին վերաբերող հարցերի վերաբերյալ։
«Վերահաստատելով Իրանի սկզբունքային քաղաքականությունը Սիրիայի ինքնիշխանությանն ու տարածքային ամբողջականությանն աջակցելու և ներքին հակամարտություններից խուսափելու և բոլոր քաղաքական, էթնիկ և կրոնական հոսանքների մասնակցությամբ ներառական կառավարություն ձևավորելու անհրաժեշտությունը, Արաղչին մտահոգություն է հայտնել զինված խմբավորումների կողմից շիա և ալավիական շրջաններում հասարակ մարդկանց և խաղաղ բնակիչների դեմ կամայական գործողությունների մասին լուրերի հրապարակման կապակցությամբ և կոչ է արել պաշտպանել փոքրամասնությունների իրավունքները»,-ասվում է հաղորդագրության մեջ։
Թուրքական լրատվամիջոցներն, էլ վկայակոչելով Թուրքիայի ԱԳՆ աղբյուրներին, հայտնում են, որ նախարարները քննարկել են տարածաշրջանային հարցեր։
Հավելենք, որ Ֆիդանը նախօրեին հեռախոսազրույց է ունեցել նաև ՌԴ ԱԳ նախարար Սերգեյ Լավրովի հետ։ Թուրքական աղբյուրների փոխանցմամբ՝ նրանք քննարկել են Սիրիայում վերջին զարգացումները։ Զրույցի ընթացքում երկու նախարարները ընդգծել են Սիրիայում ահաբեկչական կազմակերպությունների ոչնչացման կարևորությունը՝ հատուկ ուշադրություն դարձնելով պատերազմից տուժած երկրում կայունության և անվտանգության հաստատմանը։
Թարգմանությունը՝ Էմմա Չոբանյանի
