Քաղաքականություն
22.01.2025 | 15:25
Ադրբեջանի փոխվարչապետ Շահին Մուստաֆաևը Թեհրանում հանդիպել է Իրանի ազգային անվտանգության բարձրագույն խորհրդի քարտուղար Ալի Աքբար Ահմեդիiանի հետ։ Ադրբեջանական լրատվամիջոցների հաղորդմամբ՝ կողմերը քննարկել են երկկողմ հարաբերությունների զարգացմանը և Հարավային Կովկասում վերջին իրադարձություններին վերաբերող հարցեր։
Նախօրեին էլ Մուստաֆաևը հանդիպել է Իրանի նախագահ Մասուդ Փեզեշքիանի հետ։ IRNA-ի փոխանցմամբ՝ Փեզեշքիանն ընդգծել է երկու հարևանների միջև համագործակցության ամրապնդումը։
«Իրանն իր օրակարգում հիմնարար քաղաքականություն է համարում հարևան և մահմեդական երկրների հետ հարաբերությունների զարգացումն ու փոխգործակցությունը, այդ առումով Ադրբեջանի հետ հարաբերությունները մեզ համար առանձնահատուկ նշանակություն ունեն, և մենք ձգտում ենք ընդլայնել հարաբերությունները բոլոր ոլորտներում երկու երկրների միջև»,- ասել է նա։
Մուստաֆաևն իր հերթին հայտարարել է, որ վերջին տասնամյակների ընթացքում «Ադրբեջանը ջանք չի խնայել Իրանի հետ հարաբերություններն ընդլայնելու համար»:
«Ավելին, այն կարևոր փոփոխությունները, որոնց մենք ականատես եղանք Ձեր նախագահության այս կարճ ժամանակահատվածում, խոստանում են պայծառ ապագա երկու երկրների հարաբերություններում ու տարածաշրջանային իրավիճակում։ Բարձր ենք գնահատում Իրանի ազդեցիկ դերը տարածաշրջանում խաղաղության և կայունության հաստատման գործում և կարծում ենք, որ մեր տարածաշրջանի խնդիրների լուծումը հնարավոր կլինի միայն այս տարածաշրջանի երկրների կողմից։ Օտար երկրների ներկայությունը մեզ չի օգնի այս առումով»,- ասել է նա։
Հավելենք, որ Մուստաֆաևը Թեհրանում է՝ մասնակցելու Ադրբեջանի և Իրանի տնտեսական, առևտրային և հումանիտար համագործակցության միջկառավարական համատեղ հանձնաժողովի 16-րդ նիստին։
Թարգմանությունը՝ Էմմա Չոբանյանի
