14.03.2026 | 00:49
Սամվել Կարապետյանի տնային կալանքի ժամկետը երկարաձգվել է
Բաթումիում ադրբեջանական SOCAR-ի շուրջ 200 աշխատակիցներ գործադուլ են հայտարարել աշխատավարձի բարձրացման պահանջով
Քաղաքականություն
22.01.2025 | 16:54
Ադրբեջանի պետական նավթային «SOCAR» ընկերության Բաթումիի մասնաճյուղի շուրջ 200 աշխատակիցներ գործադուլ են հայտարարել։ Նրանք պահանջում են աշխատավարձի բարձրացում, հայտնում է վրացական Batumelebi-ն։
Գործադուլ են անում տարբեր ծառայությունների աշխատակիցներ։ Նրանց խոսքով՝ տարիներ շարունակ իրենք ստանում են չնչին աշխատավարձեր, ինչն անհամաչափ է իրենց ծանրաբեռնվածությանը։ Բողոքավորները պատմել են, որ 10 օր առաջ դիմել են ղեկավարությանը աշխատավարձերի բարձրացման համար, սակայն մերժում են ստացել՝ նշելով, որ աշխատավարձը սահմանվում է Պետական ծառայողների ազգային խորհրդի որոշմամբ, և մինչև 2028 թվականը չեն կարող այն բարձրացնել։
SOCAR-ի աշխատակիցները հայտնել են, որ իրենց սպառնացել են և ասել, որ կտուգանեն: Նրանց խոսքով՝ օրեցօր բաժանորդների թիվն ավելանում է, սակայն աշխատավարձերը չեն բարձրացնում։
Գործադուլավորներն ասել են, որ եթե SOCAR-ը չբարձրացնի իրենց աշխատավարձերը, գործադուլը չի ավարտվի։
«Բոլորս՝ 200-250 հոգի, պայմանավորվել ենք գործադուլ անել ու դադարեցնել աշխատանքը։ Մեր կատարած ամբողջ աշխատանքի դիմաց փոխհատուցումը պետք է լինի առնվազն 1500 լարի»,- ասել է աշխատակիցներից մեկը։
Վրաստանի SOCAR-ը տարածած հայտարարության մեջ նշել է, որ պետք է խորհրդակցություններ անցկացվեն կարգավորող մարմնի հետ, թե ինչպես կարելի է վերանայել աշխատավարձերի չափը։ Ընկերությունից հայտնել են, որ Պետական ծառայողների ազգային խորհուրդը սակագինը սահմանելիս ստեղծում է աշխատավարձի ֆոնդ, և այդ սակագինը վերանայվում է 5 տարին մեկ։ Այս հնգամյակի վերջնաժամկետը 2028 թվականն է։
Թարգմանությունը՝ Էմմա Չոբանյանի
