09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Թրամփը 90 օրով դադարեցրել է ԱՄՆ-ի օգնությունն այլ երկրներին
Քաղաքականություն
21.01.2025 | 13:28
ԱՄՆ նախագահ Դոնալդ Թրամփը պաշտոնը ստանձնելուց հետո հրամանագիր է ստորագրել այլ երկրներին ԱՄՆ-ի օգնության ծրագրերը 90 օրով դադարեցնելու մասին։ Այս ընթացքում նախատեսվում է ստուգել, թե արդյոք այդ օգնության հատկացումը համապատասխանում է նոր վարչակազմի քաղաքական նպատակներին, հաղորդում է AP-ն։ Ինչպես պարզաբանում է Reuters-ը, խոսքը վերաբերում է «միջազգային զարգացման նպատակներով» տրամադրվող օգնությանը։
Փաստաթղթում ասվում է, որ «օտարերկրյա օգնության արդյունաբերությունը և բյուրոկրատիան չեն բխում ամերիկյան շահերից և շատ դեպքերում հակասում են ամերիկյան արժեքներին»։ Միջոցների հատկացումը նաև, իբր, «ծառայում է աշխարհը ապակայունացնելուն՝ օտար երկրներում առաջ մղելով գաղափարներ, որոնք հակասում են երկրների ներսում և երկրների միջև ներդաշնակ և կայուն հարաբերություններին»:
«Միացյալ Նահանգների արտաքին օգնությունը չի տրամադրվի, քանի դեռ այն լիովին չի համապատասխանում Միացյալ Նահանգների նախագահի արտաքին քաղաքականությանը», – ընդգծել է Թրամփը։
AP-ն նշում է, որ ԱՄՆ-ից արտասահմանյան օգնությունը սովորաբար կազմում է երկրի բյուջեի մոտ 1%-ը, բացառությամբ որոշ դեպքերի, օրինակ՝ Ուկրաինային զենք տրամադրելը։ Հունվարին Պետդեպարտամենտը հայտարարել է, որ ռուսական ռազմական գործողության մեկնարկից ի վեր Կիևին հատկացվել է մոտ 66 միլիարդ դոլար։ ԱՄՆ-ի օգնության այլ հիմնական ստացողներից են Իսրայելը (տարեկան 3,3 միլիարդ դոլար), Եգիպտոսը (1,5 միլիարդ դոլար) և Հորդանանը (1,7 միլիարդ դոլար):
Թարգմանությունը՝ Տաթև Ֆռանգյանի
