25.05.2026 | 23:41
Գյումրիի արտահերթ ընտրություններ ենք իրականացնելու. Նիկոլ Փաշինյան. ՏԵՍԱՆՅՈՒԹ
Միրզոյանը շնորհավորել է Մարկ Ռուբիոյին պետքարտուղարի պաշտոնում նշանակվելու առթիվ
Քաղաքականություն
21.01.2025 | 12:25
ՀՀ ԱԳ նախարար Արարատ Միրզոյանը շնորհավորել է Մարկ Ռուբիոյին ԱՄՆ պետքարտուղարի պաշտոնում նշանակվելու կապակցությամբ։
«Ջերմագին շնորհավորանքներս Մարկ Ռուբիոյին պետքարտուղարի պաշտոնում նշանակվելու կապակցությամբ։ Հայաստանը բարձր է գնահատում է Միացյալ Նահանգների հետ իր ռազմավարական գործընկերությունը՝ հիմնված ընդհանուր արժեքների և ընդհանուր շահերի վրա։ Մենք անհաբերությամբ սպասում ենք մեր համագործակցությունը ամրապնդելուն՝ նպաստելու մեր երկու ազգերի անվտանգությանը, ժողովրդավարությանը և բարգավաճմանը,-գրել է Միրզոյանը X-ի իր միկրոբլոգում։
Հավելենք, որ ԱՄՆ Սենատը հաստատել է հանրապետական Ռուբիոյին պետքարտուղարի պաշտոնում։ Նրա հաստատման քվեարկությունը տեղի է ունեցել Դոնալդ Թրամփի երդմնակալությունից մի քանի ժամ անց: Նրա թեկնածության օգտին քվեարկել է 99 սենատոր, ոչ մի «դեմ» ձայն չի գրանցվել։
Հարկ է նկատել, որ Մարկ Ռուբիոն քաջատեղյակ է նաև Հայաստան-Ադրբեջան հարաբերություններից։ 2022 թվականի սեպտեմբերին Ադրբեջանի կողմից ՀՀ ներխուժումից և Հայաստանի ինքնիշխան տարածքներն օկուպացնելուց հետո, ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսը և Մարկ Ռուբիոն ներկայացրել էին երկկուսակցական օրենսդրական ակտ, որը դատապարտում էր Ադրբեջանի չհրահրված հարձակումը Հայաստանի վրա։ Ռուբիոն աջակցել է նաև 2023 թվականի նոյեմբերին ԱՄՆ Սենատի կողմից Հայաստանի պաշտպանության ակտի ընդունմանը։
«ԱՄՆ-ի հարկատուների դոլարները չպետք է ուղղվեն դեպի Ադրբեջան, մի ժողովրդի, որը տարածաշրջանում անկայունություն է բերել։ Սենատի իմ գործընկերները համաձայն են, և մենք միասին ընդունեցինք Հայաստանի պաշտպանության ակտը: Ներկայացուցիչների պալատի իմ գործընկերներին կոչ եմ անուն նույնն անել»,- գրել էր Ռուբիոն X-ի իր միկրոբլոգում։
Նա նաև հայտնի է Ադրբեջանում քաղբանտարկյալների խնդրի վրա ուշադրություն հրավիրելու արշավով: 2017 թվականին Ռուբիոն նամակ էր հղել նախագահ Իլհամ Ալիևին երկրում լրագրողների նկատմամբ քաղաքական հետապնդումների վերաբերյալ։ Վերջերս էլ նա ակտիվորեն քննադատում էր Ադրբեջանի իշխանություններին հայտնի տնտեսագետ ու ընդդիմադիր գործիչ Գուբադ Իբադօղլուի կալանավորման համար։
Էմմա Չոբանյան
