14.03.2026 | 14:39
Պուտինը Թրամփին առաջարկել է հարստացված ուրանը Իրանից տեղափոխել Ռուսաստան․ Axios
Ադրբեջանական Իմիշլիում անկարգություններից հետո հատուկ ռեժիմ ու զորքեր են մտցվել, ձերբակալվել է առնվազն 100 մարդ
Քաղաքականություն
20.01.2025 | 18:15
Ադրբեջանի Իմիշլիի շրջանում հունվարի 18-ին ճանապարհային ոստիկանների մեքենայի մասնակցությամբ ծանր պատահար էր տեղի ունեցել, որի հետևանքով երկու դպրոցական երեխա էր մահացել, ևս երեքը՝ վիրավորվել։ Այս ամենը հարուցել էր տեղի բնակիչների զայրույթը ու բողոքի ալիք բարձրացրել։ Մի խումբ մարդիկ ջարդել էին ոստիկանական մեքենան, ու բախումներ էին տեղի ունեցել անվտանգության ուժերի հետ։ Սոցցանցերում շրջանառվող տեսանյութերում երևում է, թե ինչպես են ցուցարարները երթով անցնում շրջանային ոստիկանության բաժանմունքի դիմաց՝ դժգոհություն հայտնելով ոստիկանության և տեղական վարչակազմի պահվածքից:
Ադրբեջանական լրատվամիջոցները հայտնում են, որ շրջանում հունվարի 18-ից գործում է հատուկ ուժեղացված ռեժիմ, ոստիկանությունը տեղակայված է վարչական շենքերի, պուրակների և հրապարակների շրջակայքում։
«Ոստիկանության աջակցությունը մոտակա տարածքներից ժամանել է երեկ՝ ժամը 2-ին։ Երեկոյան քաղաք են մտցվել ներքին զորքեր», – ասել է Իմիշլիի բնակիչներից մեկը: Բնակիչները շրջանային կենտրոնում նաև երկու զրահամեքենա են տեսել։
Տեղական աղբյուրի համաձայն՝ ձերբակալվել է 100-ից ավելի մարդ։ Հաղորդվում է, որ հիմնականում բերման են ենթարկվել նրանք, ովքեր հարձակվել են ոստիկանական մեքենայի վրա, շրջել այն, վիճաբանել ոստիկանների հետ։
«100 մարդ, միգուցե ավելի շատ ձերբակալվել է։ Նրանցից ոմանք ձերբակալվել են քաղաքի կենտրոնական հատվածում։ Եղել են նաև գիշերը իրենց տներից բերման ենթարկվածներ, ապա բաց են թողնվել»-ասել է տեղական աղբյուրը։
Թեև Ադրբեջանի Ներքին գործերի նախարարությունը ստույգ չի հայտնել ձերբակալվածների թիվն ու նրանց ինքնությունը, սակայն հրապարակել է լուսանկար, որում երևում է ձերբակալվածների մի խումբ։
Հաղորդագրության մեջ նշվում է, որ Իմիշլիի շրջանում հասարակական վայրում խուլիգանական գործողություններ կատարելու համար մի խումբ մարդիկ են ձերբակալվել։ Ըստ գերատեսչության՝ «բացված քրեական գործի առթիվ ամբաստանյալներին տրամադրվել են փաստաբաններ, ձեռնարկվում են օրենքով նախատեսված միջոցառումներ՝ օբյեկտիվ քննությունն ապահովելու ուղղությամբ»։
Էմմա Չոբանյան
