30.04.2026 | 15:10
ՀՀ-ն հետընթաց է ապրել մամուլի ազատության ինդեքսում // Փաշինյանը՝ գերիների վերադարձի մասին․ ԼՈՒՐԵՐ
Իրանի և Ռուսաստանի ստորագրած համաձայնագրի բնույթը հիմնականում տնտեսական է․ Իրանի ԱԳ նախարար
18.01.2025 | 13:15
Իրանի Իսլամական Հանրապետության արտգործնախարար Աբբաս Արաղչին հայտարարել է, որ Թեհրանի և Մոսկվայի միջև հունվարի 17-ին ստորագրված համապարփակ ռազմավարական համատեղ համաձայնագրի բնույթը հիմնականում տնտեսական է և ընդգրկում է բոլոր համապատասխան ոլորտները՝ ներառյալ առևտուրն ու զբոսաշրջությունը, տրանսպորտը, էներգետիկան և այս ոլորտում այլ հարցեր։
«Արմենպրես»-ի հաղորդմամբ՝ այս մասին հայտնում է IRNA-ն՝ մեջբերելով Իրանի արտաքին գործերի նախարարի խոսքերը։
Իրանի ԱԳ նախարարը հույս է հայտնել, որ Թեհրանի և Մոսկվայի միջև համապարփակ ռազմավարական համատեղ համաձայնագրի ստորագրումը ճանապարհ կհարթի տնտեսական, քաղաքական և մշակութային ոլորտներում համագործակցության զարգացման համար։
Աբաս Արաղչին, մանրամասներելով համաձայնագիրը, նշել է, որ այն ընդգրկում է նաև մշակութային, գիտական, դատական, իրավական և հաղորդակցության ոլորտներն, ինչպես նաև համապարփակ պատկերացում է ստեղծում երկու երկրների միջև հարաբերությունների վերաբերյալ։
Ռուսաստանի և Իրանի նախագահներ Վլադիմիր Պուտինն ու Մասուդ Փեզեշքիանը Կրեմլում հունվարի 17-ին կայացած բանակցություններից հետո համաձայնագիր են ստորագրել երկու երկրների միջև համապարփակ ռազմավարական գործընկերության մասին:
Փաստաթուղթը նախատեսված է փոխարինելու Ռուսաստանի և Իրանի միջև հարաբերությունների հիմունքների և համագործակցության սկզբունքների վերաբերյալ գործող համաձայնագրին, որը ստորագրվել է դեռևս 2001 թվականին։ Նոր համաձայնագրի վրա աշխատանքները տարվել են 2022 թվականից։ Անցյալ տարվա հունիսին հայտնի դարձավ, որ կողմերը համաձայնության են եկել դրա տեքստի շուրջ։ Ինչպես ավելի վաղ նշվել է Կրեմլում, փաստաթուղթն արտացոլում է երկկողմ հարաբերությունների բարձրացումը նոր մակարդակի վրա։
