Հայաստանին կյանքի պես անհրաժեշտ է նոր Ազգային ժողով ունենալը. Ստեփան Գրիգորյան. ՏԵՍԱՆՅՈՒԹ

Հայաստանին կյանքի պես անհրաժեշտ է նոր Ազգային ժողով ունենալը: Այս մասին Factor.am-ի հետ զրույցում հայտարարեց Գլոբալիզացիայի և տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանը:

Դիտարկմանը, թե խորհրդարանական ուժերն արդեն բաց տեքստով հայտարարել են, որ չեն սատարելու վարչապետ Նիկոլ Փաշինյանին արտահերթ ԱԺ ընտրություններ անցկացնելու հարցում, Ստեփան Գրիգորյանը պատասխանեց. «Չեմ կարծում, որ կխանգարեն: Ոչ միայն այն պատճառով, որ ես լավատես եմ, այլև այն պատճառով, որ հիմա գնում էր ընտրարշավ, այդ ընթացքում վեճեր էին, նույնիսկ կոշտ հայտարարություններ, իրոք՝ ուժերի միջև բախումը մեծ էր: Մի կողմից լավ է, որ վեճեր էին, առանձին դեպքերում, իհարկե, չափն անցել էին իրար քննադատելիս, բայց միշտ նախընտրական քարոզարշավի ժամանակ սրվում են հարաբերությունները»:

Սակայն քարոզարշավից հետո, քաղաքագետի համոզմամբ, կրքերը կհանդարտվի: Նա կասկած չունի, որ քաղաքական դաշտում գործող բոլոր ուժերը՝ առանց բացառության, կլցվեն պատասխանատվությամբ:

«Եվ ես չեմ կարծում, որ նրանք դեմ դուրս կգան արտահերթ ընտրություններ անցկացնելուն, քանի որ Հայաստանին կյանքի պես անհրաժեշտ է նոր Ազգային ժողով ունենալը»,- նշեց Ստեփան Գրիգորյանը:

Նրա համոզմամբ՝ ապրիլյան հեղափոխության ժամանակ մի շարք ուժեր իրենց որպես պետականամետ ուժեր դրսևորեցին, որովհետև հասկացան, որ «ուզած-չուզած պետք է ժողովրդի ընտրյալին աջակցես»: «Ես կարծում եմ՝ հիմա էլ նույն ձևով կպահեն իրենց»:

Մանրամասները՝ տեսանյութում