13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Թուրքիայի ՊՆ-ն սպառնում է Սիրիայում քրդական ուժերի դեմ ռազմական գործողությամբ
Քաղաքականություն
09.01.2025 | 23:14
Թուրքիայի զինված ուժերը վճռական են տրամադրված՝ թույլ չտալու PKK/YPG/SDG «ահաբեկչական կազմակերպություններին» օգտագործել ռազմավարական ենթակառուցվածքները, ինչպիսիք են Սիրիայում գտնվող Թիշրին ամբարտակը՝ տարածաշրջանն ապակայունացնելու համար։ Այս մասին հայտնել են Թուրքիայի Ազգային պաշտպանության նախարարության աղբյուրները, գրում է Անադոլու գործակալությունը։
Ըստ նրանց՝ Թուրքիան շարունակում է պայքարել ահաբեկչության դեմ՝ հավատալով համաշխարհային համագործակցության և միջազգային համերաշխության կարևորությանը։ Այս համատեքստում նրանք հայտարարել են, որ միջազգային հանրությունից ակնկալում են PKK/YPG/SDG կազմակերպությունները ճանաչել որպես ահաբեկչական կազմակերպություններ ավելի ակտիվ համագործակցել ահաբեկչության դեմ պայքարում։
Աղբյուրները նշել են, թե, իբր, «խաղաղ բնակիչներին որպես կենդանի վահան օգտագործելը և քաղաքացիական հագուստով ահաբեկիչներին տարածք բերելը մարդու իրավունքների բացահայտ խախտում է և ահաբեկչական կազմակերպությունների դաժան քաղաքականության օրինակ, որոնք անտեսում են խաղաղ բնակիչների կյանքը՝ հանուն իրենց շահերի»։
Բացի այդ, աղբյուրներն ընդգծել են, որ երկրի զինված ուժերը բազմիցս հայտարարել են Սիրիայի տարածքային ամբողջականությունը հարգելու և ահաբեկչական խմբավորումներին չաջակցելու անհրաժեշտության մասին։ Այդ կապակցությամբ նրանք, մասնավորապես, նշել են Եփրատ գետի վրա ամբարտակի ռազմավարական նշանակությունը ջրային ռեսուրսների, էներգիայի արտադրության և տարածաշրջանային անվտանգության համար:
Հավելենք, որ ավելի վաղ էլ Թուրքիայի ԱԳ նախարար Հաքան Ֆիդանն էր հայտարարել, որ Անկարան ռազմական գործողություն կիրականացնի Սիրիայում քրդական ուժերի դեմ, եթե նրանք չհեռանան երկրից։
Թարգմանությունը՝ Էմմա Չոբանյանի
