Թուրքիան սպառնում է ռազմական գործողություն սկսել, եթե քրդական ուժերը չհեռանան Սիրիայից

Թուրքիան անդրսահմանային հարձակում կսկսի Սիրիայի հյուսիս-արևելքում քրդական «Ժողովրդական պաշտպանության միավորումներ» (YPG) զինյալների դեմ, եթե խմբավորումը չկատարի Անկարայի պահանջները: Այս մասին հայտարարել է Թուրքիայի ԱԳ նախարար Հաքան Ֆիդանը, գրում է Duvar-ը։

Նա նշել է, որ Սիրիայի նոր կառավարիչները պետք է անդրադառնան խնդրին:

Թուրքիան YPG-ին, որը գլխավորում է ԱՄՆ-ի դաշնակից «Սիրիայի դեմոկրատական ​​ուժերը» (SDF), դիտարկում է որպես ահաբեկչական խմբավորում, որը կապ ունի քուրդ զինյալների հետ։ Բազմիցս խնդրելով ՆԱՏՕ-ի իր դաշնակից Վաշինգտոնին դադարեցնել խմբավորմանն աջակցությունը՝ Անկարան նախկինում մի քանի ներխուժումներ է իրականացրել YPG-ի դեմ և վերահսկում է Սիրիայի հյուսիսում գտնվող տարածքների մի մասը:

Անցյալ ամիս Սիրիայի նախկին նախագահ Բաշար Ասադի տապալումից հետո ապստամբների կողմից, որոնց մի մասին աջակցում է Թուրքիան, Անկարան պահանջել է, որ YPG-ն լուծարվի, դրա ոչ սիրիացի զինյալները լքեն Սիրիան կամ հայրենադարձվեն իրենց ծագման երկրներ, իսկ առաջնորդները հանձնվեն իշխանություններին։

CNN Turk-ի հետ զրույցում Ֆիդանն ասել է, որ Թուրքիան կարծում է՝ սիրիական նոր վարչակազմը պետք է լուծի YPG-ի ներկայության հարցը, սակայն հավելել է, որ դա կարող է ժամանակ պահանջել, քանի որ Դամասկոսում անցումային շրջան է ընթանում: Հարցին՝ ի՞նչ կանի Թուրքիան, եթե Դամասկոսը չկարողանա անդրադառնալ խնդրին, Ֆիդանը պատասխանել է՝ «ինչ անհրաժեշտ է»:

Հստակեցնող հարցին էլ՝ դա ի՞նչ է ենթադրում, պաշտոնյան պատասխանել է՝ «ռազմական գործողություն», միաժամանակ հավելելով, որ Սիրիայի նոր ղեկավարությունը կարող է ինքնուրույն պայքարել նաև YPG-ի դեմ։

SDF-ն առանցքային դեր է խաղացել 2014-2017 թվականներին ԻԼԻՊ-ի զինյալների ջախջախման գործում։ Խմբավորումը դեռևս «Իսլամական պետության» զինյալների է պահում բանտարկյալների ճամբարներում, սակայն Ասադի տապալումից հետո հայտնվել է ծանր վիճակում:

Թուրքիան ասել է, որ սիրիական նոր ղեկավարությունը փոխանցել է իր առաջարկը՝ ստանձնել այս բանտային ճամբարների կառավարումը։

Հաքան Ֆիդանը, որն անցյալ ամիս Ասադի տապալումից հետո Դամասկոս այցելած առաջին արտգործնախարարն էր, նշել է, որ Թուրքիայի նախագահ Ռեջեփ Թայիփ Էրդողանը հրահանգել է թուրք զինվորներին ստանձնել բանտային ճամբարների կառավարումը, եթե Սիրիայի նոր ղեկավարությունը չկարողանա դա անել։

Թարգմանությունը՝ Էմմա Չոբանյանի