Քաղաքականություն
08.01.2025 | 17:03
Ադրբեջանի նախագահ Իլհամ Ալիևն ու Իրանի Ազգային անվտանգության բարձրագույն խորհրդի քարտուղար Ալի Աքբար Ահմադին Բաքվում հանդիպման ժամանակ քննարկել են Ադրբեջանի և Իրանի միջև քաղաքական, տնտեսական, տրանսպորտային, էներգետիկ ու այլ ոլորտներում համագործակցության հարցեր։ Գոհունակությամբ հիշվել է, որ Իրանում նոր նախագահական ընտրություններից հետո այս երկիր են այցելել Ադրբեջանի բարձրաստիճան մի քանի պատվիրակություններ, գրում են տեղական լրատվամիջոցները։
Ադրբեջանական կողմի հաղորդմամբ՝ Իրանի ԱԽ քարտուղարն ասել է, թե «Ադրբեջանն օկուպացիայից ազատագրել է իր տարածքները, լիովին վերականգնել տարածքային ամբողջականությունն ու ինքնիշխանությունը, և շնորհավորել է այդ կապակցությամբ»։
Ալիևն իր հերթին ասել է, թե, իբր, «օկուպացիայի ժամանակ Հայաստանն ավերել է Ադրբեջանի այդ տարածքները, վնասել մշակութային և կրոնական հուշարձանները, այդ թվում՝ մզկիթները»։
Ադրբեջանի նախագահն ասել է, թե Բաքուն կողմ է տարածաշրջանային երկրների կողմից տարածաշրջանային խնդիրների լուծմանը, այդ կապակցությամբ հիշատակելով 3+3 ձևաչափը։
Հանդիպմանը շոշափվել է Հյուսիս-Հարավ տրանսպորտային միջանցքի զարգացման կարևորությունը և այդ համատեքստում Ադրբեջանի, Ռուսաստանի ու Իրանի միջև եռակողմ համագործակցության ձևաչափը։ Մտքեր են փոխանակվել նաև «Արաքսի միջանցք» ծրագրի և Արաքս գետի վրա Աղբենդի ուղղությամբ կամուրջների ու ավտոմոբիլային տրանսպորտի ենթակառուցվածքների կառուցման վերաբերյալ, նշվել է, որ այս ծրագիրն առանձնահատուկ նշանակություն ունի տարածաշրջանային տրանսպորտային կապեր զարգացման տեսանկյունից։
Քննարկվել են նաև Արաքս գետի երկայնքով ՀԷԿ-երի կառուցման նախագծերը, անդրադարձ է եղել Ադրբեջանի, Ռուսաստանի և Իրանի միջև էլեկտրահաղորդման գծերի միացման հարցին, ընդգծվել է, որ այս ուղղությամբ համագործակցության մեծ ներուժ կա։
Թարգմանությունը՝ Էմմա Չոբանյանի
