17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
Զուրաբիշվիլին հրաժարվել է բացահայտել Ղավելաշվիլիի երդմնակալության օրվա իր ծրագրերը
Քաղաքականություն
27.12.2024 | 18:29
Վրաստանի նախագահ Սալոմե Զուրաբիշվիլին չի բացահայտում դեկտեմբերի 29-ի իր ծրագրերը, երբ իշխող «Վրացական երազանք» կուսակցությունն Ընտրական կոլեգիայի կողմից ընտրված նախագահ Միխեիլ Ղավելաշվիլիի երդմնակալությունն է անցկացնելու։ Նրա լեգիտիմությունը չեն ճանաչում Զուրաբիշվիլին, ընդդիմությունը և որոշ արևմտյան երկրներ, փոխանցում է Էխո Կավկազան։
«Ես չեմ պատասխանի այս հարցին, քանի որ իշխող կուսակցությունը պետք է հենց կիրակի օրն իմանա կիրակի օրվա պլանները, ոչ թե ավելի վաղ: Կարևոր է միայն իմանալ այն, որ նախագահական ընտրությունները, ինչպես նաև երդմնակալությունն իրավական ուժ չունեն, ուստի ես մնում եմ նախագահ և շարունակում եմ իմ գործը։ Սա մի բան է, որ բոլորը պետք է իմանան: Մանրամասները հայտնի կդառնան կիրակի», – ասել է Զուրաբիշվիլին The Rest Is Politics փոդքաստի ժամանակ։
Միխեիլ Ղավելաշվիլիի երդմնակալությունը տեղի կունենա Վրաստանի խորհրդարանի շենքում։ Արարողությանը հրավիրված չեն գործող նախագահը, ընդդիմությունը, անգամ երկրում հավատարմագրված դիվանագիտական կորպուսի ներկայացուցիչներ։
Ավելի վաղ ընդդիմությունը Սալոմե Զուրաբիշվիլիին կոչ էր արել դեկտեմբերի 29-ից հետո մնալ նախագահական նստավայրում։ Իշխանությունների ընդդիմախոսներն իրենց աջակցությունն են հայտնել գործող նախագահին և հայտարարել, որ պատրաստ են անհրաժեշտության դեպքում մնալ նրա կողքին։
Թարգմանությունը՝ Տաթև Ֆռանգյանի
