Ասադի տապալումից հետո Էրդողանն առաջ է անցել իր ընդդիմադիր գլխավոր մրցակիցներից․ հարցում

Թուրքիայի նախագահ Ռեջեփ Թայիփ Էրդողանի վարկանիշն աճել է առանցքային ընդդիմադիր գործիչների համեմատ։ Վերլուծաբանները դա կապում են Բաշար Ասադի տապալումից հետո Սիրիայում ռեժիմի փոփոխության հարցում նրա վարչակազմի ակտիվ դերակատարության հետ, գրում է Turkish Minute-ը։

Asal Research-ի կողմից անցկացված հարցումը, որին մասնակցել է 1860 մարդ, չափել է ընտրողների նախապատվությունները հաջորդ նախագահական ընտրություններում: Իշխող «Արդարություն և զարգացում» կուսակցության (AKP) առաջնորդ Էրդողանը դեմ առ դեմ պայքարում գերազանցել է ընդդիմադիր գործիչներ Անկարայի քաղաքապետ Մանսուր Յավաշին և Ստամբուլի քաղաքապետ Էքրեմ Իմամօղլուին։

Ավելի վաղ անցկացված հարցումներում Էրդողանը զիջում էր և՛ Յավաշին, և՛ Իմամօղլուին, ինչը ցույց էր տալիս հասարակության դժգոհությունը տնտեսական խնդիրներից։

Էրդողան-Յավաշ մրցավազքում այժմ Էրդողանն ապահովել է 42 տոկոս աջակցություն՝ Յավաշի 39,4 տոկոսի դիմաց, իսկ հարցվածների 18,6 տոկոսը չի կողմնորոշվել: Իմամօղլուի դեմ Էրդողանը մեծացրել է իր առավելությունը՝ հասնելով համաժողովրդական ձայների 45,5 տոկոսին, իսկ Ստամբուլի քաղաքապետը հավաքել է 36,3 տոկոս, 18,2 տոկոսը կարծիք չի հայտնել։

Վերլուծաբանները ենթադրում են, որ Էրդողանի ամրապնդված դիրքերը կապված են Սիրիայում վերջին զարգացումների հետ, որտեղ Թուրքիան առանցքային դեր է խաղացել Ասադի տապալման գործում։ Տարածաշրջանում նրա հաստատակամ դիրքորոշումը, ըստ երևույթին, ուժեղացրել է ներքին աջակցությունը հատկապես ազգայնական ընտրողների շրջանում:

Թարգմանությունը՝ Էմմա Չոբանյանի