30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Էրդողանը դեկտեմբերի 27-ին կարող է այցելել Դամասկոս․ աղբյուր
Քաղաքականություն
24.12.2024 | 18:51
Թուրքիայի նախագահ Ռեջեփ Թայիփ Էրդողանի՝ Դամասկոս հնարավոր այցի շուրջ շրջանառվող լուրերն ակտիվացել են այն տեղեկություններով, որ նա, ամենայն հավանականությամբ, Թուրքիայում չի լինի այս ուրբաթ՝ դեկտեմբերի 27-ին:
«Եթե ամեն ինչ ընթանա ըստ պլանի և ձեռնարկվեն անվտանգության անհրաժեշտ միջոցներ, ակնկալվում է, որ նա կաղոթի Օմայադ մզկիթում»,- ասել է Sozcu TV-ի լրատվական ծրագրի հաղորդավար Ֆաթիհ Փորթակալը, գրում է Turkiye today-ը։
Էրդողանի հնարավոր այցը Դամասկոս զգալի փոփոխություն կնշանակի Սիրիայի հետ Թուրքիայի հարաբերություններում։ Այս լուրերը հետևում են թուրք բարձրաստիճան պաշտոնյաների, այդ թվում՝ երկրի հետախուզական ծառայության ղեկավար Իբրահիմ Քալընի և արտգործնախարար Հաքան Ֆիդանի վերջին այցերին Սիրիա։
Փորթակալը նշել է, որ Էրդողանի այցը Դամասկոս կարող է տեղի ունենալ այս ուրբաթ, որի ընթացքում նա կաղոթի Օմայադ մզկիթում և կհանդիպի Սիրիայի նոր ղեկավարության հետ: Ըստ նրա՝ եթե անսպասելի իրադարձություններ տեղի չունենան, Էրդողանի այցը, ամենայն հավանականությամբ, տեղի կունենա անվտանգության բոլոր անհրաժեշտ միջոցների պահպանմամբ։ Փորթակալը նաև նաև նշել է Սուլեյման շահի դամբարանը տեղափոխելու հնարավորությունը՝ հավելելով, որ Թուրքիան կարող է իր դրոշը բարձրացնել նոր վայրում։
Հավելենք, որ ավելի վաղ թուրքական լրատվամիջոցները հայտնել էին, որ Էրդողանը պատրաստվում է առաջիկա 15 օրերի ընթացքում այցելել Դամասկոս։
Թարգմանությունը՝ Էմմա Չոբանյանի
