Եթե ես լինեի, ես այդպիսի բան չէի ասի․ Րաֆֆի Հովհաննիսյանը՝ Նիկոլ Փաշինյանի հայտարարության մասին․ ՏԵՍԱՆՅՈՒԹ

Ես ո՛չ դատախազ եմ,  ո՛չ դատավոր և կարծում եմ, որ յուրաքանչյուր քաղաքացի ունի ազատ արտահայտվելու իրավունք և հարգում եմ այդ իրավունքը, եթե անգամ դա չեմ կիսում, այնպես որ,  եթե ես լինեի, ես Նիկոլ Փաշինյանի նման հայտարարություն չէի անի, թե «Իմ քայլը»  դաշինքին ձայն տալով քաղաքացին քվեարկում է ԱԺ-ի լուծարման օգտին։

«Ես համարում եմ, որ դա պետական գործառույթների և նախընտրական կուսակցական հարթակների շփոթում է։ Կարծում եմ՝ անհարիր է նոր Հայաստանի արժեքները, արտահերթ ընտրությունները, արդարադատությունը կապել միայն մեկ ուժի, մեկ  ցուցակի հաղթանակի հետ։ Երևանի ժողովուրդը, որը կարող է իր վստահությունը տալ «Ժառանգությանը»,  կարող է վստահ լինել, որ քաղաքային իշխանության մեջ մեր  մասնակցությամբ կունենանք արտահերթ ընտրություններ և մեր համեստ լուման կունենանք ՀՀ-ն գերկուսակցականացումից զերծ պահելու գործում»,- ասաց  Րաֆֆի Հովհաննիսյանը։

«Ժառանգություն» կուսակցության քաղաքապետի թեկնածուն նաև նկատեց, որ իրենք անկախ ընտրությունների արդյունքներից՝ շարունակելու են իրենց մասնակցությունն ունենալ Երևան քաղաքում խնդիրների լուծմանը և այդ նպատակով կօգտագործեն արտերկրում ունեցած իրենց կապերը՝ փորձելով ներդրումներ բերել քաղաքի համար։

Րաֆֆի Հովհաննիսյանը նաև նկատեց՝ քաղաքին պետք է բազմագույն իշխանություն՝ համաժողովրդական առաջընթաց արձանագրելու համար, իսկ այս համատեքստում քաղաքական ուժերը պետք է նաև վերանայեն իրենց բառապաշարն ու այս կամ  այն երևույթի նկատմամբ ունեցած վերաբերմունքը։

Մանրամասները՝ տեսանյութում։