Առաջիկայում Թուրքիայի ԱԳ նախարարը կայցելի Սիրիա

Թուրքիայի ԱԳ նախարար Հաքան Ֆիդանը առաջիկայում այցելելու է Սիրիա։ Այս մասին լրագրողների հետ զրույցում ասել է Թուրքիայի նախագահ Ռեջեփ Թայիփ Էրդողանը ինքնաթիռում Կահիրեից վերադառնալիս։

«Մենք Սիրիային մենակ չենք թողնի։ Հուսանք, շուտով այնտեղ կգնա նաև մեր արտաքին գործերի նախարար Հաքան Ֆիդանը։ Նրանք միասին են կառուցելու նոր կառույցը։ Նրանք միասին կկառուցեն նոր ենթակառուցվածնքներ»,-ասել է Էրդողանը՝ նշելով, որ Սիրիայում հակամարտությունները և տարիների պատերազմը փլուզել են պետության ենթակառուցվածքները։

«Ասադի ռեժիմի պատճառով Սիրիայի նկատմամբ կիրառվող էմբարգոն և սահմանափակումների վերացումը ձեռնտու կլինի երկրի վերականգնմանը։ Այլ խնդիր է Սիրիայի վերաինտեգրումը միջազգային հանրությանը։ Ներառական սահմանադրության ստեղծումը և քաղաքական համակարգի կառուցումը, որը կհիմնավորի Սիրիայի ապագան, նույնքան անհրաժեշտ են, որքան այս քայլերը։ Ոչ ոք չպետք է մոռանա այն փաստը, որ Սիրիայի ապագան որոշելու է սիրիացի ժողովուրդը։Մարդասիրական օգնությունը բավարար չէ։ Սպասվող մարդասիրական օգնությունն այս պահին Սիրիա չի հասնում։ Հիմա՝ այս հեղափոխությունից հետո, մեր մարդասիրական օգնությունը շարունակվում է և կշարունակվի։ Կան բազմաթի բաներ, որոնց  կարիքն ունի այս նոր վարչակազմը: Մենք նրանց մենակ չենք թողնի»,-ընդգծել է Թուրքիայի նախագահը։

Նա նաև անդրադարձել է Սիրիայում ռուսական դիվանագիտական ​​ներկայացուցչության գործունեությանը։

«Ռուսներն ասում են, որ չեն պատրաստվում փակել դեսպանատունն ու հյուպատոսությունը Սիրիայում։ Կարծում եմ՝ սա լավ է սիրիական կողմի համար»,-ասել է Էրդողանը։

Թարգմանությունը՝ Էմմա Չոբանյանի