Բաքվին պետք չեն թուրքական բազաներ․ Ալիև

Ադրբեջանում ռազմաբազա ստեղծելու Թուրքիայի մտացածին ծրագրերի մասին ԶԼՄ-ների հաղորդումները քաղաքական շահարկումներ են։ Այս մասին  ВГТРК-ին և Ռիա Նովոստիին տված հարցազրույցում հայտարարել է Ադրբեջանի նախագահ Իլհամ Ալիևը։

«Եթե կարճ, պետք չէ։ Եթե ​​մի փոքր ընդարձակեմ պատասխանս՝ հաշվի առնելով այն, որ ժամանակ առ ժամանակ նման տեղեկություններ հայտնվում են որոշակի լրատվամիջոցներում, ապա պետք է ասեմ, որ դրա կարիքը չկա»,- ասել է Ադրբեջանի նախագահը։

Նա «տեղեկատվական կեղծիք» է անվանել Ադրբեջանում թուրքական ռազմաբազա տեղակայելու ծրագրերի մասին տեղեկությունները, քանի որ ըստ Ալիևի՝ այսօր գրեթե անհնար է ռազմաբազա թաքցնել աշխարհի որևէ կետում։ Ալիևի խոսքով՝ այդ տեղեկությունը քաղաքական շահարկումների բնույթ է կրում։

Նա հիշեցրել է, որ Ադրբեջանի և Թուրքիայի միջև դաշնակցային հարաբերությունների մասին Շուշիի հռչակագիրը պարունակում է կետ, որը նախատեսում է փոխադարձ ռազմական օգնություն սպառնալիքի և ագրեսիայի դեպքում։

«Դա և՛ Ադրբեջանի, և՛ Թուրքիայի պարտավորությունն է օգնության հասնել, եթե այս կամ այն ​​երկիրը բախվի արտաքին սպառնալիքի, արտաքին ագրեսիայի։ Ուստի՝ հռչակագրի այդ կետը, ըստ էության, բացարձակապես անհարկի է դարձնում կոնկրետ տարածքում մշտական ​​ռազմական ենթակառուցվածքների ստեղծումը»,- նշել  է Ադրբեջանի նախագահը՝ հավելելով, որ երկրների միջև ավելի քան 30 տարվա ռազմական համագործակցության ընթացքում Թուրքիան և նրա ռազմական կառույցները մեծ դեր են խաղացել ադրբեջանական բանակի արդիականացման և մարտունակության, գործողությունների պլանավորման, իրավիճակի վերլուծության և ռազմական հետախուզության ներուժի բարձր չափանիշներին հասցնելու գործում։ Նա ընդգծել է, որ Բաքուն Անկարայի շնորհիվ հասել է «ռազմական գործողությունների գործունակության բարձր աստիճանի»։

Թարգմանությունը՝ Էմմա Չոբանյանի