08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
ԵՄ-ն կվերսկսի իր ներկայացուցչության աշխատանքը Սիրիայում
Քաղաքականություն
17.12.2024 | 22:30
Եվրամիությունը պատրաստ է վերսկսել Դամասկոսում իր դիվանագիտական առաքելության լիարժեք գործունեությունը, հայտարարել է ԵՄ արտաքին գործերի և անվտանգության քաղաքականության հարցերով գերագույն հանձնակատար Կայա Կալլասը։ Նախօրեին Սիրիայի մայրաքաղաք էին ժամանել եվրոպացի դիվանագետները՝ կապ հաստատելու սիրիական նոր իշխանությունների հետ։
«Մենք պատրաստ ենք վերսկսել մեր պատվիրակության աշխատանքը, որը հանդիսանում է եվրոպական դեսպանատունը, և ցանկանում ենք, որ այն աշխատի ամբողջ հզորությամբ»,- ասել է Կայա Կալլասը Ստրասբուրգում Եվրախորհրդարանի լիագումար նիստում։
Ավելի ուշ X-ի իր միկրոբլոգում նա պարզաբանել է, որ ԵՄ առաքելությունը պետք է աշխատի երկրում «կառուցողական երկխոսություն վարելու և տեղից տեղեկատվություն ստանալու համար»։ Մինչդեռ, ըստ Կալլասի, Սիրիայի դեմ պատժամիջոցների վերացումը կքննարկվի ԵՄ երկրների կողմից՝ Արաբական Հանրապետությունում «իշխանության խաղաղ փոխանցման» պայմանով։
Սիրիայում ԵՄ առաքելությունը դադարեցրել է գործունեությունը 2012 թվականին՝ երկրում շարունակվող քաղաքացիական պատերազմի պատճառով։ Այժմ ԵՄ-ն կապեր է հաստատում Սիրիայի նոր ղեկավարության հետ, որը տապալեց Բաշար Ասադին։ Դեկտեմբերի 16-ին դիվանագետները Սիրիայի համար պատասխանատու գերմանացի դիվանագետ Մայքլ Օհնմախտի գլխավորությամբ ժամանել են Դամասկոս՝ բանակցություններ վարելու։
Թարգմանությունը՝ Տաթև Ֆռանգյանի
