Պայթյուն Մոսկվայում․ զոհվել է ռուսական բանակի գեներալ Իգոր Կիրիլովը

Երեքշաբթի վաղ առավոտյան Մոսկվայի բնակելի շենքի մոտ պայթյուն է որոտացել, ինչի հետևանքով զոհվել են ՌԴ ԶՈւ ռադիացիոն, քիմիական և կենսաբանական պաշտպանության զորքերի ղեկավար Իգոր Կիրիլովը և նրա օգնականը։ ՌԴ Քննչական կոմիտեն հաստատել է, որ դեկտեմբերի 17-ի առավոտյան Մոսկվայի Ռյազանսկի պողոտայում «պայթուցիկ սարք է գործի դրվել, որը տեղադրված է եղել բնակելի շենքի մուտքի մոտ կայանված ինքնագլորում», փոխանցում է BBC-ի ռուսական ծառայությունը։

Պայթյունի հետևանքով զոհվել են գեներալ-լեյտենանտ Կիրիլովը և նրա օգնականը։

Գեներալը լայն համբավ է ձեռք բերել Ուկրաինայի դեմ Ռուսաստանի պատերազմի սկսվելուց հետո՝ պարբերաբար ելույթ ունենալով լրագրողների համար ճեպազրույցներում։ Նա բազմիցս, առանց ապացույցների, հայտարարել է, որ Կիևը ներգրավված է քիմիական և կենսաբանական զենքի մշակման մեջ:

54-ամյա Կիրիլովը ՌԴ ԶՈՒ ռադիացիոն, քիմիական և կենսաբանական պաշտպանության զորքերի ղեկավար է դարձել 2017 թվականի ապրիլին։

Դեպքի վայրից վերցվել են պայթուցիկ սարքի բաղադրամասերը, հայտնում է ՏԱՍՍ-ի թղթակիցը։ Գործակալության աղբյուրը պնդում է, որ սարքի հզորությունը կազմել է մոտ 300 գրամ տրոտիլ։ Պայթյունի ալիքից կոտրվել են դեպքի վայրի դիմաց գտնվող բնակելի շենքի պատուհանները։

Ուկրաինան չի մեկնաբանել Մոսկվայում տեղի ունեցած պայթյունը, որի հետևանքով զոհվել է գեներալը։

Նախորդ օրը Ուկրաինայի անվտանգության խորհուրդը Կիրիլովին քրեական գործով հեռակա կասկածյալ է ճանաչել. ուկրաինական հատուկ ծառայության տվյալներով՝ գեներալը պատասխանատու է արգելված քիմիական զենքի «զանգվածային օգտագործման» համար «Ուկրաինայի արևելյան և հարավային ճակատներում»։

Թարգմանությունը՝ Տաթև Ֆռանգյանի