17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
ԵՄ-ն հաստատել է Ռուսաստանի դեմ պատժամիջոցների 15-րդ փաթեթը
Քաղաքականություն
16.12.2024 | 15:28
Եվրամիության երկրների արտգործնախարարները հաստատել են Ռուսաստանի դեմ սահմանափակող միջոցների 15-րդ փաթեթը։ Պատժամիջոցներն ուղղված են «լցանավերի ստվերային նավատորմի» դեմ պայքարին, որը Մոսկվան օգտագործում է G7-ի և նրա գործընկերների կողմից սահմանված նավթի գների սահմանաչափերը շրջանցելու համար: Պատժամիջոցների ցանկում ներառված են նաև 54 ֆիզիկական անձինք և 30 կազմակերպություններ Ռուսաստանից, Չինաստանից և ԿԺԴՀ-ից, ասվում է ԵՄ կայքում տարածված հայտարարության մեջ։
Ըստ ԵՄ խորհրդի՝ պատժամիջոցներն ուղղված են ռուսական պաշտպանական և նավագնացային ընկերությունների դեմ, որոնք պատասխանատու են ծովով հում նավթի և նավթամթերքի փոխադրման համար:
Առաջին անգամ չինական տարբեր ընկերությունների նկատմամբ կիրառվում են լայնածավալ պատժամիջոցներ, այդ թվում՝ ճանապարհորդությունների արգելք, տնտեսական ռեսուրսների տրամադրում և ակտիվների սառեցում։ ԵՄ-ն նրանց համարում է Ռուսաստանի համար անօդաչու թռչող սարքերի բաղադրիչների մատակարարներ։
Պատժամիջոցների ցանկը ներառում է երրորդ երկրների 52 նավ, որոնք «Ռուսաստանի ստվերային նավատորմի մաս են կազմում» և թույլ են տալիս «շրջանցել նավթի գները սահմանափակելու կամ Ռուսաստանի էներգետիկ ոլորտին աջակցելու մեխանիզմը», ինչպես նաև ներգրավված են Ռուսաստանի համար «ռազմական տեխնիկայի փոխադրմամբ»։
Թարգմանությունը՝ Տաթև Ֆռանգյանի
