06.06.2026 | 21:10
Ջրափի գյուղի ընտրատեղամասում 3-րդ համարի քվեաթերթիկների տրցակը բացակայում էր․ ըստ ԿԸՀ-ի՝ խնդիրը տեխնիկական է
Հունգարիան վետո կդնի Վրաստանի դեմ ԵՄ պատժամիջոցների վրա
Քաղաքականություն
11.12.2024 | 15:22
Հունգարիայի արտաքին գործերի նախարար Պետեր Սիյարտոն խոստացել է վետո դնել Վրաստանում հակակառավարական ցույցերը ճնշելու համար վրաց պաշտոնյաների դեմ առաջարկված պատժամիջոցների վրա: Այս մասին նա ասել է Վրաստանի արտգործնախարար Մակա Բոչորիշվիլիի հետ մամուլի ասուլիսում, հաղորդում է Վրաստանի Առաջին ալիքը։
Սիյարտոն ընդգծել է, որ Հունգարիան «կտրականապես դեմ է» վրացի պաշտոնյաներին ԵՄ պատժամիջոցների ցուցակում ներառելուն։
«Եթե ընդդիմությունը հաղթեր ընտրություններում, Բրյուսելը բարձրաձայն կբղավեր Վրաստանում ժողովրդավարության մասին։ Նրանք կասեին, որ Վրաստանում ժողովրդավարությունը երբեք այսքան ուժեղ չի եղել, բայց ընտրություններում հաղթեց պահպանողական կուսակցությունը, և նրանք ամեն ինչ անում են, որպեսզի ժխտեն ու անտեսեն քաղաքացիների կամքը»,- ասել է նա։
Հունգարիայի արտգործնախարարը նաև կոչ է արել ԵՄ-ին և «միջազգային լիբերալ վերնախավին» կասկածի տակ չդնել «վրաց ժողովրդի ինքնիշխան իրավունքը՝ որոշելու իրենց երկրի ապագան»։
Վրաստանի թեման կքննարկվի դեկտեմբերի 16-ին ԵՄ արտաքին հարաբերությունների խորհրդում, մասնավորապես, կբարձրացվեն սահմանափակող միջոցների հարցեր։ Միաժամանակ, ըստ լրատվամիջոցների, վրացի պաշտոնյաների դեմ պատժամիջոցները կարող են խորհրդանշական լինել։
Միացյալ Նահանգները հայտարարել է, որ պատրաստ է պատժամիջոցներ կիրառել Վրաստանի իշխանությունների դեմ, որոնք փորձում են ճնշել երկրում բողոքի ցույցերը։
Թարգմանությունը՝ Տաթև Ֆռանգյանի
