Բաքուն հետևում է Սիրիայում տեղի ունեցող գործընթացներին` խորհրդակցություններ անցկացնելով Թուրքիայի հետ. Ադրբեջանի ԱԳՆ

Ադրբեջանը հետևում է Սիրիայում տեղի ունեցող գործընթացներին, այս մասին ասված է Ադրբեջանի արտաքին գործերի նախարարության հայտարարության մեջ։

Նշվում է, որ այս համատեքստում միաժամանակ խորհրդակցություններ են անցկացվում «եղբայրական Թուրքիայի հետ»։

«Սիրիայում Բաշար ալ-Ասադի ռեժիմի անկումից հետո կարևոր է երկրում խաղաղության և կայունության վերականգնումը և քաղաքացիական հակամարտության դադարեցումը։ Ադրբեջանի Հանրապետությունը ևս մեկ անգամ հայտնում է իր աջակցությունը Սիրիայի տարածքային ամբողջականությանն ու ինքնիշխանությանը և հույս ունի, որ հարցերը կլուծվեն սիրիացի ժողովրդի կամքին համապատասխան, ինչպես նաև՝ ներքաղաքական երկխոսության միջոցով։ Ադրբեջանը եղբայրական Թուրքիայի Հանրապետության և այլ համախոհ գործընկերների հետ պատրաստ է նպաստել սիրիացի ժողովրդի հումանիտար խնդիրների վերացմանը»,-ասվում է հայտարարության մեջ։

Նշվում է,որ չնայած Սիրիայում Ադրբեջանի դեսպանատուն գոյություն չունի, աշխատանքներ են տարվում Սիրիայում Ադրբեջանի քաղաքացիների թվի և գտնվելու վայրի պարզման ուղղությամբ։ Բաքուն նաև Սիրիայից կշարունակի իր քաղաքացիների հայրենադարձությունը Թուրքիայի տարածքով։

«Ադրբեջանը հուսով է, որ Սիրիայում իրավիճակի կայունացումից հետո Ադրբեջանի և Սիրիայի միջև երկկողմ հարաբերությունները կվերականգնվեն, համագործակցությունը կզարգանա փոխադարձ բարեկամության և գործընկերության սկզբունքի հիման վրա»,- ընդգծվում է հայտարարության մեջ։

Թարգմանությունը՝ Էմմա Չոբանյանի