17.03.2026 | 16:43
Իրանի հետ պատերազմում վիրավորվել է 200 ամերիկացի զինվոր
Ահազանգեր կան, որ Երևանի որոշ դպրոցներում ուսուցիչները քարոզչություն են անում այս կամ այն ուժի օգտին․ Արայիկ Հարությունյան․ ՏԵՍԱՆՅՈՒԹ
Հասարակություն
20.09.2018 | 13:37
Մենք ունեցել ենք լուրեր, ահազանգեր, որ Երևանի դպրոցներում ուսուցիչները քարոզչություն են անում այս կամ այն ուժի օգտին: Այս մասին այսօր՝ սեպտեմբերի 20-ին, ՀՀ կառավարության նիստից հետո լրագրողների հետ ճեպազրույցում հայտարարեց կրթության և գիտության նախարար Արայիկ Հարությունյանը: Սակայն, ըստ նրա, որևէ մեկին մեղադրելու համար կոնկրետ բողոք է պետք. «Մենք ունեցել ենք լուրեր, խոսակցություններ, բոլոր ուղղություններով անմիջապես միջոցներ ենք ձեռարկել: Բայց երբ ուղիղ չեն գալիս, ասում, որ այս ուսուցիչը հորդորում է կոնկրետ այս ուժին ընտրել, մենք չենք կարող մեղադրանք ներկայացնել տնօրենի կամ ուսուցչին»:
Թատրոնի և կինոյի պետական ինստիտուտի ուսանողների դասադուլի ու պահանջի մասին էլ Արայիկ Հարությունյանն ասաց՝ իրենց իրավասության սահմաններում փորձելու են հասկանալ, թե ինչ առնչություն է ունեցել ռեկտորը չարաշահումներին:
«Պետք է ասեմ, որ շատ լուրջ պատասխանատվության հարց կա: Խոսքը կառավարման համար պատասխանատվության մասին է, և եթե նույնիսկ ռեկտորը ներգրավված չէ այդ կոռուպցիոն սխեմաներում, դրանք տեղի են ունեցել իր ղեկավարման ընթացքում: Ամեն դեպքում՝ պատասխանատվություն պետք է կրի»,- ասաց նախարարը:
Նշենք, որ խոսքն ինստիտուտում չարաշահումների մասին ոստիկանության հայտարարության մասին է, որի համաձայն, մասնավորապես, 2012-2016 թթ. ընթացքում բուհում հաստիքներ են բացվել, մարդիկ աշխատավարձ են ստացել, բայց փաստացի չեն աշխատել: Կրթական համակարգում չարաշահումների դեպքերով հարուցված քրեական գործերը, Արայիկ Հարությունյանի տեղեկացմամբ, ընդհանուր առմամբ, հինգ տասնյակից ավելի են:
