Արհեստական բանականություն, տիեզերական տեխնոլոգիաներ․ քննարկվել է Օմանի Սուլթանության հետ համագործակցելու հնարավորությունները

ՀՀ  բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանն ընդունել է Հայաստանի Հանրապետությունում  Օմանի Սուլթանության արտակարգ և լիազոր դեսպան Համուդ Ալ Տովայային (նստավայրը՝ Մոսկվա) և ՀՀ-ում Օմանի Սուլթանության պատվավոր հյուպատոս Պերճ Օհանյանին։

«Գևորգ Մանթաշյանը՝ կարևորելով Հայ-օմանական հարաբերությունների զարգացումը, ներկայացրել է նախարարության պատմությունը, գործունեության ուղղությունները, ռազմավարական թիրախները ու իրականացվող ծրագրերը՝ ընդգծելով, որ նախարարությունը պատրաստակամ է երկխոսության և համագործակցության՝ ոլորտային բոլոր ուղղություններով»,- ասված է ԲՏԱ նախարարության հաղորդագրությունում։

Համուդ Ալ Տովայան խոսել է «Oman Vision 2040»-ի կարևորության մասին և իր հերթին նշել է, որ Օմանում մեծ ուշադրություն է դարձվում տեխնոլոգիաների զարգացմանը։ Հատկապես տեղեկատվական տեխնոլոգիաների և թվային փոխակերպման ուղղությամբ աշխատանքները, որոնք իրականացվում են Օմանի տրանսպորտի, կապի և տեղեկատվական տեխնոլոգիաների նախարարության ենթակայությամբ, երկրի համար կարևորագույն ռազմավարական ուղղություններից են։

Նշվում է, որ կողմերը քննարկել են համագործակցության հիմքեր ստեղծելու մի շարք հնարավորություններ տեղեկատվական տեխնոլոգիաների, կիբեռանվտանգության, թվայնացման, արհեստական բանականության, տիեզերական տեխնոլոգիաների այլ ուղղություններով։

Կարևորվել է փոխադարձ մասնակցությունը ոլորտային միջոցառումներին և իրադարձություններին, ինչպես նաև՝ ընկերությունների միջև գործակցային հարաբերություների հաստատումը։

Պայմանավորվածություն է ձեռք բերվել քայլեր ձեռնարկել համագործակցության օրակարգի իրագործման ուղղությամբ։