17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
Հարավային Կորեայի ՊՆ ղեկավարը ներողություն է խնդրել քաղաքացիներից և հրաժարական ներկայացրել
Քաղաքականություն
04.12.2024 | 16:11
Հարավային Կորեայի պաշտպանության նախարար Կիմ Յոնգ Հյունը, որը երկրում ռազմական դրություն մտցնելու նախաձեռնողն է, ներողություն է խնդրել քաղաքացիներից ստեղծված իրավիճակի համար։ Նա ասել է, որ հրաժարականի դիմում է ներկայացրել նախագահ Յուն Սոկ Յոլին։ Նա ստանձնել է զինվորականների գործողությունների պատասխանատվությունը, քանի որ նրանք կատարել են իր հրամանները։
«Որպես ազգային պաշտպանության նախարար՝ ես լիովին ընդունում եմ պատասխանատվությունը և ափսոսում եմ հանրությանը խառնաշփոթ ու անհանգստություն պատճառելու համար»,- լրագրողներին ասել է Կիմ Յոնգ Հյունը, փոխանցում է Yonhap-ը:
Նա հաստատել է, որ անձամբ է Յուն Սոկ Յոլին առաջարկել ռազմական դրություն հայտարարել։
Ընդդիմությունը մի քանի ժամ առաջ փաստաթուղթ է ներկայացրել խորհրդարանական համապատասխան մարմնին՝ պաշտպանության նախարարին, նախագահին, ինչպես նաև ներքին գործերի և անվտանգության նախարարներին իմփիչմենթ հայտարարելու առաջարկով։ Հարավային Կորեայի առաջատար ընդդիմադիր ուժը՝ Դեմոկրատական կուսակցությունը, խոստացել է նրանց դեմ մեղադրանք առաջադրել դավաճանության համար։
Ըստ Yonhap-ի՝ Կիմ Յոնգ Հյունը «խիստ գաղտնիության պայմաններում» պլան էր պատրաստում ռազմական դրության կիրառման համար։
Հիշեցնենք, որ դեկտեմբերի 3-ին Յուն Սոկ Յոլը ռազմական դրություն հայտարարեց երկրում՝ վկայակոչելով «հյուսիսկորեամետ» ընդդիմության՝ սահմանադրական կարգը խախտելու փորձերը կանխելու անհրաժեշտությունը։
Թարգմանությունը՝ Տաթև Ֆռանգյանի
