08.01.2025 | 23:43
Հրդեհ Վանթյան փողոցի տներից մեկում. դեպքի վայր է մեկնել չորս մարտական հաշվարկ
Խստորեն պահպանել սահմանված ժամանակացույցը․ Քաղաքաշինության կոմիտեի նախագահը՝ Սպիտակի շինհրապարակներում
Տնտեսություն
04.12.2024 | 13:38
Քաղաքաշինության կոմիտեի նախագահ Եղիազար Վարդանյանը շրջայց է կատարել Լոռու մարզում կոմիտեի պատվիրատվությամբ իրականացվող ծրագրերի շինարարական հրապարակներում։ Քաղաքաշինության կոմիտեի փոխանցմամբ՝ շրջայցի ընթացքում կոմիտեի նախագահը ծրագրերում ընդգրկված կազմակերպություններին հորդորել է խստորեն պահպանել սահմանված ժամանակացույցը և հետևողական լինել աշխատանքները բարձր որակով ու պատասխանատվությամբ կատարելու հարցում՝ ընդգծելով, որ ընդունվելու է միայն որակյալ արդյունքը։
Հիշեցնենք, որ մոտ երկու շաբաթ առաջ Կառավարության նիստի ընթացքում ՀՀ վարչապետ Նիկոլ Փաշինյանն ասել էր․ «Զգուշացնո՛ւմ եմ, սրանից հետո մի հատ ժամկետ խախտվեց, գալու է անձնական պատասխանատվության պահը»։
«Սպիտակ քաղաքում Եղիազար Վարդանյանը դիտարկել է բնակելի նոր շենքի կառուցման ծրագրի ընթացքը։ Վթարային փայտյա հանրակացարանային 2 շենքի փոխարեն կառուցվում է 4 մասնաշենքից բաղկացած բազմաբնակարան շենք՝ 36 բնակարանով։ Ներկայում կատարվում են մուտքի դռների տեղադրման, ներքին և արտաքին պատերի հարդարման աշխատանքները՝ տուֆով, բազալտով և ֆիբրոցեմենտով։ Իրականացվում են նաև բարեկարգման՝ մայթերի եզրաքարերի և խաղահրապարակի կառուցման աշխատանքները։
Շինարարական կազմակերպության ներկայացուցիչների հետ կոմիտեի ղեկավարը քննարկել է ժամանակացույցի վերաբերյալ հարցեր։ Նշվել է եղանակային բարենպաստ պայմաններում որոշ աշխատանքների իրականացման անհրաժեշտությունը։
Սպիտակում կառուցվում է նաև «Մոդուլային» տիպի 144 տեղ հզորությամբ մսուր-մանկապարտեզ։ Ծրագիրն ավարտական փուլում է։ Ընթանում են ներքին հարդարման, ջեռուցման մարտկոցների տեղադրման և արտաքին բարեկարգման վերջին աշխատանքները։
Մսուր-մանկապարտեզն ունենալու է խաղահրապարակ՝ արհեստական խոտածածկով, արևային ֆոտովոլտային կայան, ոռոգման ցանց, ապաստարան՝ հագեցած օդափոխության ժամանակակից համակարգով և դիզել-գեներատորով»,- ասված է Քաղաքաշինության կոմիտեի տարածած հաղորդագրությունում։
Հիշեցնենք նաև, որ ընթացիկ տարվա հունվարի 4-ին ՀՀ քաղաքաշինության կոմիտեի նախկին նախագահ Արմեն Ղուլարյանն ազատվել էր պաշտոնից։ Նախօրեին ՀՀ վարչապետ Նիկոլ Փաշինյանն այցելել էր Լոռու մարզ` ծանոթանալու կառավարության կողմից իրականացվող ծրագրերի ընթացքին։ Նա շինարարական խախտումներ էր նկատել ու նկատողություններ արել կատարված աշխատանքների առնչությամբ։
Արմեն Ղուլարյանն ազատվեց Քաղաքաշինության կոմիտեի նախագահի պաշտոնից․ ՏԵՍԱՆՅՈՒԹ
