08.01.2025 | 23:43
Հրդեհ Վանթյան փողոցի տներից մեկում. դեպքի վայր է մեկնել չորս մարտական հաշվարկ
Գերմանիան վերանայում է Վրաստանի հետ համագործակցությունը
Քաղաքականություն
04.12.2024 | 15:55
Գերմանիայի տնտեսական համագործակցության և զարգացման նախարար Սվենյա Շուլցեն հայտարարել է, որ Վրաստանի հետ համագործակցությունն ամբողջությամբ վերանայվում է, փոխանցում է Գրուզիա օնլայնը։
Նրա խոսքով՝ «Վրացական երազանքն» իր որոշմամբ առնվազն ժամանակավորապես արգելափակում է քաղաքացիների եվրոպական ապագայի հնարավորությունը։ Չնայած սրան՝ վրացիների մեծ մասը ցանկանում է միանալ ԵՄ-ին և ամեն օր դուրս է գալիս Թբիլիսիի և այլ քաղաքների փողոցներ, քանի որ ցանկանում է եվրոպական Վրաստան, ասել է գերմանացի պաշտոնյան: Նա նաև հիշեցրել է, որ Եվրամիության հետ կապն արտացոլված է երկրի Սահմանադրության մեջ։
«Վրաստանի այս կառավարության հետ զարգացման համագործակցությունն այլևս չի կարող իմաստալից լինել: Վրաստանի հետ համագործակցությունը վերանայվում է։ Նոր նախագծեր չեն լինելու, վարկային պայմանագրեր չեն կնքվելու։ Մենք կարող ենք հետագա քայլեր ձեռնարկել՝ համաձայնեցնելով ԵՄ-ի և միջազգային գործընկերների հետ»,- նշել է Շուլցեն:
Ըստ նրա՝ իր ղեկավարած նախարարությունը մինչ այժմ աջակցել է Վրաստանի եվրոպական ուղուն, սակայն երկրի իշխանության հետ համագործակցություն այլևս չի կարող իրականացվել։
Թարգմանությունը՝ Տաթև Ֆռանգյանի
