Հարավային Կորեայի ընդդիմությունը հայտարարել է, որ մտադիր է հասնել նախագահի իմփիչմենթին

Հարավային Կորեայի ամենամեծ ընդդիմադիր ուժը՝ «Տոբուրո» դեմոկրատական ​​կուսակցությունը հայտարարել է, որ մտադիր է հասնել երկրի նախագահ Յուն Սյոկ Յոլի իմփիչմենթին՝ երկրում ռազմական դրություն սահմանելու և այն վերացնելու շուրջ ստեղծված իրավիճակի ֆոնին, գրում է DW-ի ռուսական ծառայությունը։

Ընդդիմադիր կուսակցությունը նշել է, որ ապստամբության մեղադրանք են ներկայացնելու պետության ղեկավարին, պաշտպանության և ներքին գործերի նախարարներին, ինչպես նաև «առանցքային զինվորական և ոստիկանական գործիչների, ինչպիսիք են ռազմական դրության հրամանատարը և ոստիկանապետը»։ Միաժամանակ, Հարավային Կորեայի նախագահի աշխատակազմի անդամները զանգվածաբար հայտարարել են հրաժարական տալու ցանկության մասին։

Դեկտեմբերի 4-ին մի շարք հասարակական կազմակերպությունների ներկայացուցիչներ հավաքվել էին Սեուլի Կվանխվամուն հրապարակում՝ դատապարտելու նախագահի կողմից ռազմական դրություն մտցնելը և պահանջելու կառավարության հրաժարականը, հայտնում է Yonhap-ը։ Ոստիկանությունը ցուցարարների թիվը գնահատել է 400 մարդ։

ԱՄՆ-ն էլ Հարավային Կորեայում ստեղծված իրավիճակի ֆոնին որոշել է հետաձգել Հյուսիսային Կորեայի միջուկային զսպման համատեղ զորավարժությունները։ Միջուկային խորհրդատվական խմբի առաջին հրամանատարաշտաբային զորավարժությունները նախատեսվում էր անցկացնել Վաշինգտոնում դեկտեմբերի 4-5-ը։

Սեուլում ԱՄՆ դեսպանատունը նախազգուշացում է տարածել իր քաղաքացիների համար Հարավային Կորեայում արտակարգ իրավիճակի վերաբերյալ։

«Ռազմական դրությունը չեղարկելու մասին նախագահ Յունի հայտարարությունից հետո իրավիճակը մնում է անկայուն»,- ասվում է հայտարարության մեջ։

Դեսպանատունը նաև խորհուրդ է տվել ԱՄՆ քաղաքացիներին խուսափել ցույցերի տարածքներից և զգույշ լինել «մեծ բազմությունների, հավաքների, բողոքի ակցիաների կամ հանրահավաքների» մոտ՝ հավելելով, որ խաղաղ ցույցերը կարող են վերածվել առճակատման և բռնության։

Միաժամանակ, Շվեդիայի վարչապետ Ուլֆ Քրիստերսոնը հետաձգել է դեկտեմբերի 5-ին նախատեսված իր այցը Հարավային Կորեա։Այս մասին հայտնում է Yonhap գործակալությունը՝ հղում անելով դիվանագիտական ​​աղբյուրներին։

Հիշեցնենք, որ դեկտեմբերի 3-ի երեկոյան Հարավային Կորեայի նախագահը անսպասելիորեն հայտարարել էր երկրում ռազմական դրություն մտցնելու մասին, սակայն այն բանից հետո, երբ խորհրդարանը հրաժարվեց աջակցել այս քայլին, նա չեղյալ է հայտարարել  այդ որոշումը  դեկտեմբերի 4-ի առավոտյան։Յունը հիմնավորել էր ռազմական դրություն մտցնելու անհրաժեշտությունը՝ ասելով, թե «ընդդիմությունը կաթվածահար է անում պետական ​​գործառույթները հակապետական ​​գործունեությամբ»։

Թարգմանությունը՝ Էմմա Չոբանյանի