12.01.2026 | 20:37
Քննարկվել է Գիտության ոլորտի զարգացման 2026-2030 թվականների ռազմավարական ծրագրի նախագիծը
Հարավային Կորեայի նախագահը հայտարարել է երկրում ռազմական դրություն մտցնելու մասին
Քաղաքականություն
03.12.2024 | 18:53
Հարավային Կորեայի նախագահ Յուն Սյոկ Յոլը ժողովրդին ուղղված հեռուստաուղերձում հայտարարել է երկրում ռազմական դրություն մտցնելու մասին, հաղորդում է Yonhap գործակալությունը։
«Ես հայտարարում եմ ռազմական դրություն՝ արմատախիլ անելու հյուսիսկորեամետ ուժերին և պաշտպանելու ազատ սահմանադրական կարգը»,- ասել է նա։
Ավելի վաղ կառավարության հետ արտակարգ հանդիպման ժամանակ Յուն Սյոկ Յոլը հայտարարել էր իր դեմ իմփիչմենտի գործընթաց իրականացնելու փորձերի մասին։
Իր ելույթում նախագահը ռազմական դրության սահմանումն անվանել է «անխուսափելի միջոց՝ ապահովելու մարդկանց ազատությունն ու անվտանգությունը, ինչպես նաև երկրի կայունությունը հակապետական ուժերի գործողություններից»։ Նա նշել է, որ ռազմական դրությունը կարող է որոշակի անհարմարություններ պատճառել քաղաքացիներին, սակայն իշխանությունները կենտրոնանալու են նման անհարմարությունները նվազագույնի հասցնելու ուղղությամբ։
«Արտաքին քաղաքականության մեջ ոչ մի փոփոխություն չկա, Կորեայի Հանրապետությունը կատարում է իր պարտականություններն ու ներդրումը միջազգային հանրության առաջ»,- հավելել է երկրի նախագահը։
Թարգմանությունը՝ Տաթև Ֆռանգյանի
