Ադրբեջանի ՊՆ ղեկավարը Թուրքիայի ԶՈՒ հետախուզության պետի հետ ռազմական համագործակցության և տարածաշրջանային անվտանգության հարցեր է քննարկել

Ադրբեջանի պաշտպանության նախարար Զաքիր Հասանովն ընդունել է պաշտոնական այցով Բաքվում գտնվող Թուրքիայի Զինված ուժերի գլխավոր հետախուզական վարչության պետ, գեներալ-գնդապետ Յաշար Քադիօղլուի գլխավորած պատվիրակությանը։ Ադրբեջանի ՊՆ-ի հաղորդմամբ՝ Հասանովն ընդգծել է, որ երկու եղբայրական երկրների միջև ռազմական ոլորտում համագործակցությունը զարգանում է՝ ինչպես մյուս ոլորտներում։ Նա նշել է ադրբեջանա-թուրքական ռազմական երկխոսության շրջանակում բարձր մակարդակով իրականացվող միջոցառումների կարևորությունը։

Թուրքական պատվիրակությանը տեղեկացվել է բանակաշինության ոլորտում հաջող բարեփոխումների մասին։

Թուրք գեներալն էլ հայտարարել է, որ Թուրքիայի և Ադրբեջանի միջև ռազմավարական դաշինքը հիմնված է բարեկամության և եղբայրության վրա։ Ընդգծվել է, որ համատեղ զորավարժությունները մեծ նշանակություն ունեն փորձի փոխադարձ փոխանակման տեսանկյունից։

Հանդիպմանը քննարկվել են նաև ռազմական համագործակցության զարգացման հեռանկարները և տարածաշրջանային անվտանգության հարցեր։

Թուրքական պատվիրակության և Ադրբեջանի բանակի գլխավոր շտաբի պետ, գեներալ-գնդապետ Քերիմ Վելիևի հանդիպմանն էլ ուշադրություն է դարձվել երկրների միջև ռազմական համագործակցության հետագա ընդլայնման նպատակով նման հանդիպումների անհրաժեշտությանը։ Նշվել է համատեղ զորավարժությունների ինտենսիվության ավելացման կարևորությունը՝ երկու երկրների զինվորականների պրոֆեսիոնալիզմի հետագա կատարելագործման համար։

Թարգմանությունը՝ Էմմա Չոբանյանի