Մենք ուսումնասիրության առարկա դարձնում ենք, թե երկրում որևէ գործով որևէ անձի ապօրինի գաղտնալսո՞ւմ են, թե՝ ոչ. Գևորգ Կոստանյան. ՏԵՍԱՆՅՈՒԹ

Գևորգ Կոստանյանը չի նույնացնի Հանրապետական իշխանության տարիներին ընդդիմադիր գործիչներ Արթուր Բաղդասարյանի, Ալեքսանդր Արզումանյանի, Վարդան Օսկանյանի և Լևոն Զուրաբյանի նկատմամբ իրականացված գաղտնալսումները և վերջերս ԱԱԾ տնօրենի ու Հատուկ քննչական ծառայության պետի հեռախոսազրույցի գաղտնալսումը:

«Ես չգիտեմ, այդ ձեր թվարկած անձանց գաղտնալսումները եղել են օրենքով սահմանված կարգո՞վ, թե՞ օրենքով սահմանված կարգի խախտմամբ։ Ես չգիտեմ։ Դուք կարող եք ենթադրել։ Ես ենթադրելու համար բավարար հիմքեր չունեմ։ Իսկ այն հանգամանքը, որ ԱԱԾ տնօրենին են գաղտնալսում և ՀՔԾ պետին, ակնհայտ ապօրինի է»,- ասում է ՀՀ նախկին գլխավոր դատախազը։

Գևորգ Կոստանյանը խորհրդարանում քննիչ հանձնաժողովի նախաձեռնողներից մեկն է, նա այսօր վախ ունի, որ իրեն էլ կարող են գաղտնալսել․ «Ցանկացած մարդ այդ մտահոգությունն ունի, դուք էլ, վստահ եմ, ունեք»։

Հանձնաժողովը փորձելու է հասկանալ, թե օրենսդրական ի՞նչ մեխանիզմներ կան, որպեսզի Հայաստանում մարդիկ պաշտպանվեն գաղտնալսումներից։ Հարուցված քրեական գործի հետ քննիչ հանձնաժողովը ոչ մի աղերս չի ունենալու։ Պարոն Կոստանյանը, սակայն, ակնարկում է, որ հանձնաժողովը քննության առարկա է դարձնելու Արթուր Վանեցյանի և դատավորներից մեկի զրույցը։

«Մենք ունենք հատուկ նորմ Քրեական օրենսգրքում՝ արդարադատության իրականացմանը խոչընդոտելը, ՔՕ 332 հոդվածն է։ Իսկ այդ փաստի կապակցությամբ քրեական գործ հարուցված չէ»,- բացահայտում է պարոն Կոստանյանը։

Նա հասկացնում է նաև, որ քանի որ ԱԱԾ տնօրենն ու Հատուկ քննչական ծառայության ղեկավարը հեռախոսազրույցում խոսում են Ռոբերտ Քոչարյանի գործից, քննիչ հանձնաժողովը քննելու է նաև Դատախազության գործունեությունը՝ արդյոք Քոչարյանի գործի նախաքննության և հետաքննության օրինականությունն ապահովող դատախազությունն իրականացրե՞լ է պատշաճ հսկողություն։

«Անգամ ապացույցների բացարձակ առկայության և գործի բացարձակ հիմնավորվածության պայմաններում, եթե մենք ունենում ենք անօրինական միջամտության կամ արդարադատությանը խոչընդոտելու կամ անօրինական միջամտելու դրսևորում, դա ամբողջ արդարադատությունը դարձնում է ոչ օբյեկտիվ, հետևաբար դա հանգեցնում է որպես կանոն արդարացումների»,- զգուշացնում է ՀՀ ԱԺ պետաիրավական հարցերի հանձնաժողովի նախագահը։

Լրագրողները Գևորգ Կոստանյանին հիշեցրեցին, որ արդար դատաքննության խնդիրները ծագել են դեռևս հանրապետական իշխանության ժամանակ, դրանք կային նաև այն ժամանակ, երբ Հայաստանի գլխավոր դատախազն էր Գևորգ Կոստանյանը։ Վերջինս ընդունում է, որ խնդիրներ եղել են, բայց միայն այդքանը։

«Ես չեմ կարող իմ մասնագիտության փաստով պայմանավորված նման գնահատականներ տալ առանց փաստերի։ Եթե կան նման դեպքեր, ապա պետք է պատժվեն։ Եթե երբևէ նման դեպքեր եղել են, ես չեմ բացառում»,- ասում է Գևորգ Կոստանյանը։

Իսկ ինչպե՞ս է վարվելու քննիչ հանձնաժողովը, եթե Հատուկ քննչական ծառայությունը քրեական գործ հարուցի նաև արդարադատության իրականացմանը խոչընդոտելու մասով։ Գևորգ Կոստանյանը պատասխանում է, իր բառերով, շատ համբերատար։

«Ես արդեն 36 անգամ էս երեք օրերի ընթացքում կրկնեցի՝ որ խնդիրը վերաբերում է ավելի գլոբալ, ոչ թե կոնկրետ քրեական գործին, և մենք ուսումնասիրության առարկա դարձնում ենք, թե երկրում երբևէ որևէ գործով որևէ անձի ապօրինի գաղտնալսո՞ւմ են, թե՝ ոչ»,– պարզաբանում է Գևորգ Կոստանյանը։

Ի դեպ, նա չցանկացավ պատասխանել այն հարցին, թե քննիչ հանձնաժողովը քննության առարկա կդարձնի՞ 2012-ին Լևոն Զուրաբյանի և Վարդան Օսկանյանի հանդիպման գաղտնալսումը։

Մհեր Արշակյան