Ադրբեջանի ընդդիմադիր կուսակցության անդամները ծեծի են ենթարկվել ոստիկանության բաժանմունքում

Բաքվի Նասիմի շրջանի 20-րդ ոստիկանական բաժանմունքում ծեծի են ենթարկվել դատարանի մոտից բերման ենթարկված Ադրբեջանի ընդդիմադիր «Ժողովրդական ճակատ» կուսակցության 10 անդամները։ Նրանց նկատմամբ արձանագրություն է կազմվել Վարչական իրավախախտումների վերաբերյալ օրենսգրքի 510-րդ և 535.1-րդ հոդվածներով (մանր խուլիգանություն և ոստիկանությանը չենթարկվելը): Այս մասին ադրբեջանական լրատվամիջոցներին հայտնել է ձերբակալվածներից Գյուլնարա Ռահիմովան, որն ազատ է արձակվել։

Նա պատմել է, որ բերման ենթարկվածերից չորսին դաժան ծեծի են ենթարկել։

«Ռուսլան Ամիրովի դեմքն այլանդակված էր, ձախ կողոսկրը կոտրված էր, դժվարությամբ էր շնչում։ Ինձ էլ են ծեծել, ձեռքիս եղունգը պոկվել է։ Բաժնում դեռ 10 ակտիվիստ կա»,- պատմել է նա։

Համացանցում տարածվում են նաև ընդդիմադիրներին բռնությամբ ձերբակալելու կադրերը։

Հավելենք, որ ընդդիմադիրները հավաքել էին դատարանի շենքի մոտ Ադրբեջանի ընդդիմադիր «Ժողովրդական ճակատ» կուսակցության նախագահ Ալի Քերիմլիի դեմ հարուցված գործով դատավարությանը։ Եզրափակիչ ելույթում դատախազը պահանջել է Քերիմլիին դատապարտել 6 ամսվա ազատազրկման, պաշտպանական կողմը պնդել է արդարացնելու հարցում։

Դատարանը Քերիմլիին դատապարտել է 1500 մանաթի (մոտ 900 ԱՄՆ դոլար) չափով տուգանքի՝ նրան մեղավոր ճանաչելով Քրեական օրենսգրքի 147.1 (զրպարտություն) հոդվածով։ Ընդդիմադիր գործչի փաստաբանը վճիռն անվանել է «անհիմն, անօրինական և անարդար»։

Ինքը՝ Քերիմլին, դատարանի վճիռն անվանել է «պատվիրված որոշում», որը կապ չունի օրենքի հետ։

«Ադրբեջանի իշխանություններն այս շինծու գործը վարում են արդեն 4 ամիս, բայց ադրբեջանական և համաշխարհային հանրությունը դրան լուրջ չի վերաբերվում։ Բոլորը հասկանում են, որ իշխանությունները պարզապես փորձում են իրենց մրցակցին բանտարկել անհեթեթ մեղադրանքով»,- հայտարարել է նա։

Էմմա Չոբանյան