Քաղաքականություն
02.12.2024 | 22:13
Իրանի ԱԳ նախարար Աբբաս Արաղչին Անկարայում Թուրքիայի ԱԳ նախարար Հաքան Ֆիդանի հետ մամուլի ասուլիսում հայտարարել է, որ կոնսենսուսի են հասել Աստանայի գործընթացի ձեռքբերումները պահպանելու վերաբերյալ:
«Մենք նաև համաձայնության ենք եկել Աստանայի հաջորդ հանդիպման հարցում: Մենք աջակցում ենք այս գործընթացին: Մենք պետք է թույլ չտանք, որ այս գործընթացն արգելափակվի»,- ասել է իրանցի պաշտոնյան։
Նշենք, որ Սիրիայի հակամարտության կարգավորման համար Աստանայի գործընթացում ներառված են ՌԴ-ն, Թուրքիան և Իրանը։
Արաղչին նշել է, որ Սիրիայում խաղաղությունն ու կայունությունը պետք է պահպանվեն՝ ամբողջ տարածաշրջանում խաղաղությունն ու կայունությունը պահպանելու համար։
«Սիրիայի հետ կապված տարածաշրջանում խորհրդատվությունները մեծ նշանակություն ունեն: Այս առումով Թուրքիայի հետ խորհրդակցությունը միշտ մեծ նշանակություն ունի: Այն շատ կարևոր է Սիրիայում լարվածությունը նվազեցնելու համար։ Մեր խորհրդակցությունները եղել են հստակ, բարեկամական և կառուցողական։ Մենք համաձայն ենք, որ Սիրիան պետք է շարժվի դեպի խաղաղություն և կայունություն։ Պետք է պաշտպանել նրա տարածքային ամբողջականությունն ու ինքնիշխանությունը։ Պետք է նաև անհրաժեշտ միջոցներ ձեռնարկվեն Սիրիայում լավ կառավարման համար»,- ասել է Իրանի ԱԳ նախարարը։
Նա, միաժամանակ, հայտարարել է Թուրքիայի հետ տարաձայնությունների մասին։
«Չնայած որոշ հարցերում առկա տարաձայնություններին՝ մենք որոշեցինք ավելի սերտ խորհրդակցություններ և երկխոսություն անցկացնել: Մենք կհամագործակցենք՝ հանուն տարածաշրջանում կայունության»,- եզրափակել է Արաղչին։
Թարգմանությունը՝ Էմմա Չոբանյանի
