Եթե մեկ հայ վերադառնա Ղարաբաղ, ապա մեկ ադրբեջանցի պետք է վերադառնա «Արևմտյան Ադրբեջան»․ Մեջլիսի պատգամավոր

Ադրբեջանի Միլլի Մեջլիսում այսօր լսումներ են անցկացվել «Անվտանգ և արժանապատիվ վերադարձ Արևմտյան Ադրբեջան» թեմայով։ Բաքուն Հայաստանն է անվանում, այսպես կոչված, «Արևմտյան Ադրբեջան», և այս կեղծիքի տարածման համար տարբեր միջոցառումներ է կազմակերպում։

Մեջլիսի լսումների ժամանակ պատգամավոր Ֆազիլ Մուստաֆան հայտարարել է, որ հայկական կողմը ձգտում է հասնել նրան, որ Ադրբեջանի վրա ճնշում գործադրվի Ղարաբաղ հայերի վերադարձի հարցում։

«Եթե մեկ հայ վերադառնա Ղարաբաղ, ապա մեկ ադրբեջանցի պետք է վերադառնա «Արևմտյան Ադրբեջան», եթե հազար հայ վերադառնա, ապա հազար ադրբեջանցի պետք է վերադառնա «Արևմտյան Ադրբեջան»։ Այս հակադարձ պայմանները պետք է բարձրացվեն միջազգային հարթակներում»,- ասել է Մուստաֆան։

Ադրբեջանի ԱԳՆ միջազգային անվտանգության վարչության ղեկավար Սամիր Բեջանովն էլ ասել է,թե «Հայաստանը լրջորեն խախտում է միջազգային իրավունքը՝ դեռևս պայմաններ չապահովելով «արևմտյան ադրբեջանցիների» վերադարձի համար»։

«Միջազգային իրավական ակտերն աջակցում են փախստականների վերադարձին ոչ միայն իրենց երկիր, այլև այն տարածքներ, որտեղ նրանք նախկինում ապրել են: Հայաստանը, որպես այդ տարածքի իրավահաջորդ պետություն, պետք է ապահովի նրանց իրավունքները»,- նշել է ԱԳՆ պաշտոնյան։

Պատգամավոր Ազայ Գուլիևն էլ առաջարկել է այդ հարցով հատուկ ներկայացուցիչ նշանակել։

«Անհրաժեշտ է նախաձեռնող խմբի համար զեկուցող նշանակել և փաստաթղթավորել «Արևմտյան Ադրբեջանում» կատարված վանդալիզմի հանցագործությունները։ Այս փաստերն ու նյութերը զեկուցողը պետք է ներկայացնի օտար երկրներին, խորհրդարաններին ու հասարակական կազմակերպություններին»,- հայտարարել է պատգամավորը։

Հավելենք, որ Արցախում ռազմական ագրեսիա և էթնիկ զտում իրականացնելուց հետո պաշտոնական Բաքուն շարունակում է չկատարել 2023 թվականի նոյեմբերի 17-ի ՄԱԿ-ի Արդարադատության միջազգային դատարանի որոշումը, որով Ադրբեջանը պարտավոր է ապահովել Լեռնային Ղարաբաղի հայ բնակչության «անվտանգ, անխոչընդոտ և արագ վերադարձը»։

Էմմա Չոբանյան