Սիրիայի իշխանությունները փակել են Հալեպի օդանավակայանը և քաղաք տանող բոլոր ճանապարհները

Սիրիական իշխանությունները շաբաթ օրը փակել են Հալեպի օդանավակայանը, ինչպես նաև քաղաք տանող բոլոր ճանապարհները, Reuters-ին հայտնել են երեք ռազմական աղբյուրներ։

Ընդդիմության գրոհայինները՝ «Հայաթ Թահրիր ալ-Շամ» իսլամիստական ​​խմբավորման գլխավորությամբ, այս շաբաթ անսպասելի զավթում են իրականացրել կառավարական վերահսկողության տակ գտնվող քաղաքներում և հասել Հալեպ՝ Ասադի և նրա դաշնակիցների կողմից դուրս մղվելուց գրեթե մեկ տասնամյակ անց:

Ռուսաստանը՝ Ասադի հիմնական դաշնակիցներից մեկը, խոստացել է Դամասկոսին հավելյալ ռազմական օգնություն ցուցաբերել առաջիկա 72 ժամվա ընթացքում։

Նշվում է, որ ընդդիմադիր գրոհայինները քաղաք են վերադառնում 2016 թվականից ի վեր առաջին անգամ, երբ Ասադը և նրա դաշնակիցները՝ Ռուսաստանը, Իրանը և տարածաշրջանային շիա աշխարհազորայինները, վերագրավեցին Հալեպը:

Ջեյշ ալ-Իզա ապստամբների բրիգադի հրամանատար Մուստաֆա Աբդուլ Ջաբերն ասել է, որ իրենց արագ առաջխաղացմանը նպաստել է Իրանի կողմից աջակցվող կենդանի ուժի բացակայությունը Հալեպում:

Թուրքական հետախուզության հետ կապ ունեցող ընդդիմադիր աղբյուրները հայտնել են, որ Թուրքիան, որն աջակցում է ապստամբներին, կանաչ լույս է վառել հարձակման համար:

Սակայն Թուրքիայի արտաքին գործերի նախարարության խոսնակ Օնջու Քեչելին ուրբաթ օրը ասել է, որ Թուրքիան ձգտում է խուսափել տարածաշրջանում ավելի մեծ անկայունությունից և զգուշացրել է, որ վերջին հարձակումները խաթարում են դեէսկալացիայի համաձայնագրերը։

Այս հարձակումը ամենախոշորն է 2020 թվականի մարտից ի վեր, երբ Ռուսաստանը և Թուրքիան համաձայնության եկան հակամարտության դեէսկալացիայի շուրջ։

Ավելի վաղ Factor.am-ը գրել էր, որ  Սիրիայում մարտերի հետևանքով երեք օրվա ընթացքում 27 խաղաղ բնակիչ է զոհվել, այդ թվում՝ երեխաներ։

Հայտնել էինք նաև, որ Իրանի Իսլամական հեղափոխության պահապանների (ԻՀՊԿ) բարձրագույն հրամանատար է սպանվել Սիրիայի Հալեպ նահանգում ընդդիմադիր իսլամիստական ​​ուժերի հարձակման ժամանակ:

Պատրաստեց՝ Անահիտ Խաչատրյանը