09.09.2026 | 08:46
Փաշինյանը մեկնել է Ֆրանսիա՝ մասնակցելու Միջազգային տիեզերական գագաթնաժողովին
Ռոստովի մարզում ԱԹՍ-ի հարվածից հետո հրդեհ է բռնկվել արդյունաբերական ձեռնարկությունում
Քաղաքականություն
29.11.2024 | 12:29
Ռոստովի մարզում անօդաչու թռչող սարքի հարվածից հետո հրդեհ է բռնկվել Կամենսկի շրջանի «մեծ արդյունաբերական օբյեկտում», գրում է Current Time-ը։
Այս մասին հայտարարել է նահանգապետի պաշտոնակատար Յուրի Սլյուսարը՝ չնշելով օբյեկտի տեսակը։ Ըստ շրջանի ղեկավարի՝ զոհեր և վիրավորներ չկան։ Ինչպես հայտնում է Baza Տելեգրամ ալիքը, Կամենսկի շրջանում նավթի պահեստ է այրվում։
Պաշտոնյան հայտնել է նաև, որ անօդաչու թռչող սարքերի բեկորները վնասել են Կամենսկի շրջանի Մասալովկա գյուղի և Տարասովսկի շրջանի Դյաչկինո բնակավայրի առանձնատները։
Նահանգապետի պաշտոնակատարի խոսքով՝ մարզում 30 անօդաչու թռչող սարք են խոցել։
Ռուսաստանի պաշտպանության նախարարությունը հայտնել է, որ հակաօդային պաշտպանության ուժերը գիշերը ռուսական շրջաններում խոցել են ուկրաինական 47 անօդաչու թռչող սարքեր։
Գերատեսչության տվյալներով՝ Ռոստովի մարզում ոչնչացվել է 29 անօդաչու թռչող սարք, Կրասնոդարի երկրամասում՝ ութը, Բելգորոդի, Բրյանսկի և Վորոնեժի շրջաններում՝ երեքական, իսկ բռնակցված Ղրիմում՝ մեկական անօդաչու թռչող սարք։
Բրյանսկի շրջանում, ըստ շրջանի ղեկավարի, նույնպես զոհեր չկան։ Մյուս շրջաններում հարձակման հետևանքները դեռևս անհայտ են։
Թարգմանությունը՝ Տաթև Ֆռանգյանի
