28.11.2024 | 20:38
Միրզոյանը և Ֆինլանդիայի նախագահը մտքեր են փոխանակել տարածաշրջանային հարցերի շուրջ
«ՀԱՊԿ-ը չպետք է Ղարաբաղում կռվեր Երևանի համար»․ Պուտին
Քաղաքականություն
28.11.2024 | 18:06
ՀԱՊԿ-ը Ղարաբաղում չպետք է կռվեր Երեւանի համար, այդ դեպքում Հայաստանի դեմ արտաքին ագրեսիա չի եղել։ Այս մասին Աստանայում ՀԱՊԿ գագաթնաժողովի շրջանակում հրավիրված ասուլիսում հայտարարել է ՌԴ նախագահ Վլադիմիր Պուտինը, գրում է ՌԻԱ Նովոստին։
«Հայաստանի դեմ ագրեսիա չի եղել։ ՀԱՊԿ-ը կոչված է անդամ երկրներին պաշտպանելու արտաքին ագրեսիայից։ Լեռնային Ղարաբաղի հետ կապված իրադարձություններն ունեն իրենց առանձնահատկությունները, քանի որ Հայաստանը չի ճանաչել Ղարաբաղը որպես անկախ պետություն և, իհարկե, Ղարաբաղը չի ներառել իր պետական պարագծի մեջ։ Սա նշանակում է, որ այն ամենը, ինչ տեղի է ունեցել Ղարաբաղում, իրավական տեսակետից, ուղղակի կապ չունի Հայաստանի հետ»,- հայտարարել է Պուտինը։
Նա, միաժամանակ, տարօրինակ է անվանել Հայաստանի ղեկավարության այն կարծիքը, թե ՀԱՊԿ-ը պետք է կռվեր այս տարածքում։
«Մի տեսակ տարօրինակ է, այնպես չէ՞»,- ասել է Պուտինը։
Նա նաև շատ զգայուն է անվանել Լեռնային Ղարաբաղի հիմնախնդիրը։
«Իմ կարծիքով՝ կազմակերպության անդամ յուրաքանչյուր երկիր պետք է ինքն իր համար որոշի, թե ինչն է համապատասխանում իր ազգային շահերին»,- ասել է ՌԴ նախագահը՝ նշելով, թե Հայաստանի ներկայիս վերաբերմունքը ՀԱՊԿ-ի նկատմամբ թելադրված է ներքաղաքական խնդիրներով և Լեռնային Ղարաբաղի թեմայով։
Պուտինն ընդգծել է, որ Հայաստանը չի հայտարարել կազմակերպությունից դուրս գալու մասին, և ՀԱՊԿ-ում Երևանի լիարժեք աշխատանքի վերադառնալու հավանականությունը պահպանվում է։
«Հայաստանը չի հայտարարել իր դուրս գալու մասին [ՀԱՊԿ-ից], համենայն դեպս՝ առայժմ։ Հայտարարվել է, որ ընդմիջում է անում, բայց, միևնույն ժամանակ, պաշտպանում է բոլոր այն փաստաթղթերը, որոնք ընդունվել են մեր այսօրվա հանդիպման ժամանակ։ Եթե այդպես է, ապա հավանականություն կա, որ Հայաստանը կվերադառնա լիարժեք աշխատանքի»,- ասել է ՌԴ նախագահը։
Հավելենք, որ ՀՀ-ն ՀԱՊԿ-ին չի դիմել ԼՂ-ում կռվելու համար։ Երևանը պաշտոնապես դիմել է ՀԱՊԿ-ին 2021 և 2022 թվականներին, երբ Ադրբեջանի կողմից ՀՀ ինքնիշխան տարածքները, որոնք գտնվում են ՀԱՊԿ պատասպանատվության գոտում, ենթարկվեցին Ադրբեջանի կողմից ռազմական ագրեսիայի։
Թարգմանությունը՝ Էմմա Չոբանյանի
