Ուրսուլա ֆոն դեր Լեյենը ԵՄ երկրներին կոչ է անում ավելացնել պաշտպանական ծախսերը՝ մոտեցնելով ռուսական մակարդակին

Եվրահանձնաժողովի ղեկավար Ուրսուլա ֆոն դեր Լեյենը, ելույթ ունենալով Եվրախորհրդարանի անդամների առաջ, կոչ է արել ԵՄ երկրներին ավելացնել պաշտպանական ծախսերը՝ հասցնելով Ռուսաստանի հետ համեմատելի մակարդակի։ Նրա ելույթը նախորդել է Եվրախորհրդարանի պատգամավորների՝ Եվրոպական հանձնաժողովի նոր կազմի հարցով քվեարկությանը, որը երկրորդ անգամ կգլխավորի ֆոն դեր Լեյենը, գրում է BBC-ի ռուսական ծառայությունը։

APF-ի փոխանցմամբ՝ նա նշել է, որ ԵՄ երկրները, ընդհանուր առմամբ, ծախսում են իրենց ՀՆԱ-ի 1,9%-ը պաշտպանության վրա, մինչդեռ Ռուսաստանը ծախսում է մինչև 9%-ը, և «դրանում ինչ-որ բան այն չէ»։

Ֆոն դեր Լեյենի նշած ցուցանիշն ավելի մոտ է պաշտպանության և անվտանգության ոլորտում Ռուսաստանի բյուջեի ընդհանուր ծախսերին. այն գնահատվում է Ռուսաստանի ՀՆԱ-ի շուրջ 8%-ը կամ նրա ընդհանուր բյուջեի ծախսերի շուրջ 40%-ը:

Պաշտպանության զուտ ծախսերը Ռուսաստանում արագորեն աճում են Ուկրաինայի լայնամասշտաբ պատերազմի տարիների ընթացքում և 2025 թվականի բյուջեում կկազմեն ՀՆԱ-ի 6,3%-ը։

ՆԱՏՕ-ի երկրներն իրենց առջև նպատակ են դրել պաշտպանական ծախսերը հասցնել ՀՆԱ-ի մինչև 2 տոկոսին։ Դաշինքի 32 անդամներից այս տարի այս նպատակին հասել են 23-ը։

ԵՄ-ն ներառում է մի շարք չեզոք երկրներ, որոնք ՆԱՏՕ-ի անդամ չեն և չունեն մեծ բանակներ, օրինակ՝ Իռլանդիան, Ավստրիան, Մալթան և Կիպրոսը։

«Մենք պետք է հավակնոտ լինենք, քանի որ սպառնալիքները լուրջ են»,- հայտարարել է Ուրսուլա ֆոն դեր Լեյենը:

Թարգմանությունը՝ Էմմա Չոբանյանի