30.04.2026 | 20:48
Մեր ազգն այժմ պետք է կենտրոնանա ներկայի և ապագայի վրա, այլ ոչ թե մնա անցյալում. Արարատ Միրզոյանի հարցազրույցը France 24-ին
Իսրայելը հավանություն է տվել Լիբանանում հրադադարի համաձայնագրին․ Ynet
Քաղաքականություն
25.11.2024 | 13:00
Իսրայելը նախնական համաձայնություն է տվել Լիբանանում «Հըզբոլլահ»-ի հետ հրադադարի մասին առաջարկվող համաձայնագրին, հաղորդում է իսրայելական Ynet պորտալը՝ հղում անելով իսրայելական, ամերիկյան և լիբանանյան աղբյուրներին։
Ըստ աղբյուրների՝ վերջնական որոշումը պետք է կայացնի Իսրայելի կառավարությունը։
Ամերիկյան Axios-ն էլ գրում է, որ Մերձավոր Արևելքում ԱՄՆ հատուկ բանագնաց Ամոս Հոխշտեյնը սպառնացել է դուրս գալ բանակցություններից, եթե Իսրայելի իշխանությունները չհամաձայնվեն մոտ օրերս հրադադարի շուրջ։
Պորտալի տվյալներով՝ համաձայնագրի նախագիծը ներառում է 60-օրյա անցումային շրջան, որի ընթացքում իսրայելցի զինվորականները պետք է լքեն հարավային Լիբանանը։ Ակնկալվում է, որ լիբանանյան բանակը կտեղակայվի սահմանին մոտ գտնվող շրջաններում, մինչդեռ «Հըզբոլլահ»-ն իր ծանր սպառազինությունը կտեղափոխի Լիտանի գետից հյուսիս:
Իսրայելցի բարձրաստիճան պաշտոնյան ասել է, որ համաձայնագրի մասին կարող է պաշտոնապես հայտարարվել այս շաբաթ: Axios-ի իսրայելական մեկ այլ անանուն աղբյուր պնդում է, որ մի շարք հարցեր դեռևս մնում են չլուծված:
Սեպտեմբերի վերջից Իսրայելը Լիբանանում «Հըզբոլլահ»-ի ենթակառուցվածքների ոչնչացման գործողություն է իրականացնում։ Այն, որ Լիբանանն ու «Հըզբոլլահ»-ը համաձայնել են Իսրայելի հետ հրադադարի մասին ԱՄՆ-ի առաջարկին, հայտնի դարձավ անցյալ շաբաթ։ «Հըզբոլլահ»-ը ներկայացրել է իր պատասխանը հրադադարի համաձայնագրի ամերիկյան նախագծին։ Կազմակերպության գլխավոր քարտուղար Նաիմ Քասեմը դեմ է հանդես եկել, որ Իսրայելն իրավունք ունենա ուժ կիրառել հետհակամարտային շրջանում։
Թարգմանությունը՝ Տաթև Ֆռանգյանի
