Դավիթ Խուդաթյանը նշանակվել է ՀՀ տարածքային կառավարման և ենթակառուցվածքների նախարար

Հայաստանի Հանրապետության նախագահի աշխատակազմից տեղեկացնում են, որ նախագահ Վահագն Խաչատուրյանի հրամանագրով Դավիթ Խուդաթյանը նշանակվել է ՀՀ տարածքային կառավարման և ենթակառուցվածքների նախարար:

«Հիմք ընդունելով վարչապետի առաջարկությունը` համաձայն Սահմանադրության 131-րդ հոդվածի, ինչպես նաև «Կառավարության կառուցվածքի և գործունեության մասին» օրենքի 5-րդ հոդվածի 1-ին մասի. Դավիթ Խուդաթյանին տարածքային կառավարման և ենթակառուցվածքների նախարար»,-ասված է հրամանագրում։

Հիշեցնենք, որ նոյեմբերի 18-ին վարչապետը գրությամբ հայտնել էր, որ մի խումբ բարձրաստիճան պաշտոնյաների խնդրել է թողնել իրենց զբաղեցրած պաշտոնները։ Իսկ նախորդ Կառավարության նիստի ժամանակ Փաշինյանը հայտարարել էր, որ դատական և ուժային կառույցներում բարեփոխումների արդյունքները չի տեսնում։

Հրաժարական ներկայացնող պաշտոնյաների շարքում էր նաև նախկին ՏԿԵ նախարար Գնել Սանոսյանը, որը նոյեմբերի 18-ին աշխատանքից ազատման դիմում էր գրել։

Կենսագրություն

Տարեթիվ, ամսաթիվ, ծննդավայր
3 օգոստոս 1991 թ., Արմավիրի մարզ, Արմավիր քաղաք

Կրթություն

2008-2014 թթ. սովորել է Հայաստանի պետական տնտեսագիտական համալսարանի (ՀՊՏՀ) Ինֆորմատիկայի և վիճակագրության ֆակուլտետի՝ Կառավարման տեղեկատվական համակարգեր մասնագիտությամբ

Աշխատանքային գործունեություն

2014-2017 թթ. աշխատել է «ՖԻՆՔԱ» ունիվերսալ վարկային կազմակերպությունում՝ որպես Արմավիր մասնաճյուղի մասնագետ

2017-2018 թթ. աշխատել է «Ադմաքս» ՍՊԸ-ում՝ որպես կոմերցիոն մենեջեր
2018 թ. աշխատել է «ՄՈԳՈ» ՈՒնիվերսալ վարկային կազմակերպությունում՝ որպես Կենտրոն մասնաճյուղի մասնագետ

Հայաստանի Հանրապետության վարչապետ Նիկոլ Փաշինյանի 2018 թվականի հունիսի 27-ի 836-Ա որոշմամբ նշանակվել է Արմավիրի մարզի Արմավիր համայնքի ղեկավարի պաշտոնակատար

2018 թ. հոկտեմբերի 21-ին տեղական ինքնակառավարման մարմինների ընտրություններում ընտրվել է Արմավիրի քաղաքապետ

2021 թ. դեկտեմբերի 5-ին տեղական ինքնակառավարման մարմինների համամասնական ընտրակարգով տեղի ունեցած ընտրությունների արդյունքում ընտրվել է ՀՀ Արմավիրի մարզի Արմավիր համայնքի ղեկավար

2024թ. հունվարի 11-ին ՀՀ կառավարության 42-Ա որոշմամբ նշանակվել է ՀՀ Արմավիրի մարզպետ:

Այլ տվյալներ

2009-2011 թթ. ծառայել է ՀՀ Զինված ուժերում:

Կուսակցական պատկանելություն

Քաղաքացիական պայմանագիր կուսակցության անդամ է։

Անձնական տվյալներ

Ամուսնացած է, ունի երկու երեխա։