04.04.2026 | 10:29
Արտարժույթների փոխարժեքները՝ ապրիլի 4-ի դրությամբ
Վրաստանում իրավապաշտպանները պահանջում են դադարեցնել խաղաղ ցուցարարների անօրինական ձերբակալությունները
Քաղաքականություն
19.11.2024 | 13:07
Վրաստանի Երիտասարդ իրավաբանների ասոցիացիան ոստիկանությանը կոչ է արել դադարեցնել Թբիլիսիում խաղաղ ցուցարարներին ուժով ցրելն ու անօրինական ձերբակալությունները, գրում է Newsgeorgia-ն։
Իրավապաշտպան կազմակերպությունը պնդում է, որ ՆԳՆ-ն խախտել է հավաքների ազատության իրավունքը։
Այս պահին հայտնի է Թբիլիսիի կենտրոնական Մելիքիշվիլիի փողոցից առնվազն տասը մասնակցի բերման ենթարկելում մասին։ Ձերբակալությունները սկսվել են այն բանից հետո, երբ ոստիկանությունը ցուցարարներին հեռացրել է Ճավճավաձեի պողոտայից և ապամոնտաժել վրանային քաղաքը, որտեղ երկրորդ օրն է՝ նոր խորհրդարանական ընտրությունների պահանջով հանրահավաք էր ընթանում։
Առնվազն երկու մարդ ծանր վնասվածքներ է ստացել։ Ընդդիմադիր «Ախալի» կուսակցությունը հայտնել է, որ իրենց քաղխորհրդի անդամ Նիկա Կվիտաիանիին տեղափոխել են հիվանդանոց։
Սոցիալական ցանցերում և ԶԼՄ-ներում տարածվում են ոստիկանության կոշտ գործողությունների բազմաթիվ կադրեր ոչ միայն ցուցարարների, այլև մամուլի դեմ։ Մեդիաօմբուդսմենը Վրաստանի Հատուկ քննչական ծառայությանը կոչ է արել անհապաղ սկսել բողոքի ցույցը ցրելու ժամանակ լրագրողների նկատմամբ պետական պաշտոնյաների և ոստիկանների կողմից կատարված հանցագործությունների հետաքննությունը։
Միաժամանակ, հայտարարության մեջ ՆԳՆ-ին կոչ է արվում դադարեցնել բռնությունները լրատվամիջոցների աշխատողների և հանրահավաքի մասնակիցների նկատմամբ։
Լրագրողների վերաբերյալ այս պահին հայտնի է հետևյալը՝ Mtavari-ից Սերգի Բարամիձեն բերման է ենթարկվել նկարահանումների ժամանակ, հատուկ նշանակության ջոկատի աշխատակիցները թույլ չեն տվել OC Media-ի լրագրող Մարիամ Նիկուրաձեին և Netgazeti-ի լրագրող Գիվի Ավալիանիին արձանագրել, թե ինչ է կատարվում, իրավապահները հարձակվել են Publika-ի լրագրող Մինդիա Գաբաձեի վրա։
Թարգմանությունը՝ Տաթև Ֆռանգյանի
