Նախադրյալ չկա մտածելու, որ տոմսային համակարգը պատրաստ չի լինելու հունվարի 1-ին․ Գրիգորյան․ ՏԵՍԱՆՅՈՒԹ

Երևանի փոխքաղաքապետ Սուրեն Գրիգորյանն ավագանու նիստին ներկայացրեց տրանսպորտի սակագնային փաթեթում սոցիալական տարբեր խմբերի համար նախատեսված արտոնությունները։
«Նախագծով նախատեսվում է, որ մինչև 7 տարեկան երեխանների համար անվճար մատուցվի հանրային տրանսպորտի ծառայությունը, դպրոցականների համար՝ 8-17 տարեկանների համար, ներառել 20 տոկոս զեղչ, ծնողազուրկ դպրոցականների համար՝ անվճար, թոշակառուներին, որոնց 63 տարեկանն արդեն լրացել է՝ 30 տոկոս, ուսանողներին, որոնք ուսանում են Երևան քաղաքում, անկախ նրանց հաշվառման վայրից՝ 15 տոկոս, ծնողազուրկ ուսանողներին՝ անվճար, հաշմանդամություն ունեցող անձանց, 1-ին կամ 2-րդ խմբի, կամ նոր դասակարգմամբ՝ խորը կամ ծանր, կլինի անվճար, պետական խնամքի տակ գտնվող, մանկատներում կամ ծերանոցներում գտնվող անձանց՝ անվճար, նպաստառուներին, որոնք համապատասխան կարգավիճակ ունեն և որոշակի աջակցություն են ստանում պետությունից՝ 20 տոկոս, նախկին ԽՍՀՄ հերոսներ, Սոցիալիստական աշխատանքի հերսներ, Հայաստանի ազգային հերոսներ, «Մարտական խաչ» առաջին և երկրորդ աստիճանի և «Փառքի» երեք աստիճանի շքանշաններով պարգևատրված անձանց նույնպես՝ անվճար և բազմազավակ ընտանիքների ծնողներին նույնպես անվճար կլինի: Նախագիծն ուղղված է գլխավորապես փոփոխվող սակագնի պայմաններում այն խմբերին, որոնք իրապես դրա կարիքն ունեն»,- նշեց Գրիգորյանը:
«Ազգային առաջընթաց» խմբակցության անդամ Հայկ Գրիգորյանը հարց ուղղեց փոխքաղաքապետին, թե ինչ է նախատեսում անել քաղաքապետարանը, եթե զեղչերի համակարգի տեխնիկական մասը պատրաստ չլինի մինչև հունվարի 1-ը։ Գրիգորյանը պատասխանեց, որ այս պահին նախադրյալ չկա մտածելու, որ հունվարի 1-ից տոմսային համակարգը պատրաստ չի լինելու։

Մանրամասները՝ տեսանյութում։