22.12.2024 | 22:00
Ինքնաթիռի կործանում Բրազիլիայում․ կան զոհեր և տուժածներ
Աբխազիայի նախագահը հրաժարական է տվել
Քաղաքականություն
19.11.2024 | 10:57
Աբխազիայի ինքնահռչակ հանրապետության նախագահ Ասլան Բժանիան հրաժարական է տվել, վարչապետ Ալեքսանդր Անկվաբը նույնպես լքել է պաշտոնը։ Այս մասին հայտնում է Эхо Кавказа-ն։
«Երկրում կայունությունը և սահմանադրական կարգը պահպանելու նպատակով, Աբխազիայի Հանրապետության Սահմանադրության 65-րդ հոդվածի համաձայն, ես հրաժարական եմ ներկայացնում Աբխազիայի Հանրապետության Նախագահի պաշտոնից»,- ասվում է փաստաթղթում, որը Բժանիան ստորագրել է իշխանությունների և ընդդիմության միջև ժամեր տևած բանակցություններից հետո։
Ըստ կողմերի միջև ստորագրած համաձայնագրի՝ Բժանիան հրաժարական է տալիս, իսկ տարածքում և կառավարական շենքերի համալիրում հավաքված ցուցարարները հեռանում են։ «Այս կետը չկատարելու դեպքում Հանրապետության Նախագահը Բժանիան հետ է վերցնում հրաժարականի դիմումը»,- նշված է հրամանագրում։
Այսօր Աբխազիայի խորհրդարանը քննարկելու է Բժանիայի հրաժարականը։ Նախագահի պարտականությունները կատարելու է փոխնախագահ Բադրա Գյունբան։ Վարչապետի պաշտոնում նշանակվել է խորհրդարանի նախկին նախագահ Վալերի Բգանբան։
«Գործող նախարարներն իրենց պարտականությունները կատարում են այնքան ժամանակ, քանի դեռ Աբխազիայի Հանրապետության նորընտիր նախագահը չի ստանձնել իր պարտականությունները»,- նշվում է փաստաթղթում։
Ավելի վաղ Բժանիան հայտնել էր, որ ծրագրում է մասնակցել նախագահական ընտրություններին։ Հաջորդ ընտրությունները պետք է կայանային 2025 թվականի գարնանը, սակայն այժմ դրանք կարող են տեղի ունենալ ավելի վաղ։
Այս հրաժարականը պարտադրված էր ընդդիմության կողմից։ Հիշեցնենք, որ նոյեմբերի 15-ին Ռուսաստանի հետ ներդրումային համաձայնագրին դեմ արտահայտվողցուցարարները քանդել էին խորհրդարանի մոտ գտնվող արգելապատնեշն ու մտել շենքի տարածք։ Երեկոյան նրանք սկսել էին գրոհել նաև շենքը, որտեղ գտնվում է նախագահի աշխատակազմը։
Թարգմանությունը՝ Էմմա Չոբանյանի
