Թբիլիսիում ընդդիմությունը պատրաստվում է վերսկսել բողոքի ցույցերը դրանք ցրելուց հետո

Թբիլիսիում ընդդիմության առաջնորդները հայտարարել են, որ բողոքի ակցիան կվերսկսվի, սակայն մանրամասներ դեռ չեն հրապարակվում։
Երեքշաբթի լուսադեմին ոստիկանությունը ցրել է Թբիլիսիի պետական համալսարանի առաջին մասնաշենքի մոտ հավաքված ցուցարարներին, գրում է Newsgeorgia-ն:

«Բողոքի ցույցերը կշարունակվեն մեկ այլ վայրում կամ կրկին Ճավճավաձեի պողոտայում»,- ասել է «Հանուն փոփոխությունների կոալիցիայի» առաջնորդ Նիկա Գվարամիան։ Ընդդիմության առաջնորդները հետագա գործողությունների մասին կհայտարարեն առաջիկա ժամերին։

Կոալիցիայի մեկ այլ առաջնորդ Նիկի Մելիայի խոսքով՝ «պայքարը չի դադարում», և բողոքի մասշտաբներն ու ինտենսիվությունը կավելանան։
«Մենք այս երկիրը կազատենք նրանցից առանց ուժի կիրառման։ Սա Վրաստանն է, սա Եվրոպա է, սա Ռուսաստանը չէ: Որքա՞ն ժամանակ է պահանջվում ազատասեր մարդկանց կրթելու համար։ Դա երբեք չի ավարտվի, այն չի ավարտվել հազարավոր տարիների ընթացքում և չի ավարտվի նույնիսկ հիմա», – ասել է Մելիան լրագրողներին:

Հիշեցնենք, որ Թբիլիսիի Ճավճավաձե պողոտայում նոր ընտրությունների անցկացման պահանջով հանրահավաքը սկսվել էր նոյեմբերի 17-ի երեկոյան։ Բողոքի գործողությունները ղեկավարում է «Հանուն փոփոխությունների կոալիցիան» «Միասնություն-Ազգային շարժում» կուսակցության հետ համակարգմամբ։ Ցուցարարները վրաններ էին տեղադրել Թբիլիսիի կենտրոնի կարևորագույն տրանսպորտային հանգույցներից մեկում՝ Վարազիսխեվի, Ճավճավաձե, Մելիքիշվիլի, Կեկելիձե փողոցների խաչմերուկում։

Ոստիկանության մոբիլիզացիան սկսվել է նոյեմբերի 18-ի երեկոյան այն բանից հետո, երբ քաղաքական առաջնորդները հայտարարեցին, որ հանրահավաքը կշարունակվի առնվազն ևս 24 ժամ։ Առավոտյան անվտանգության ուժեր, ջրցան մեքենաներ և այլ հատուկ տեխնիկա է տեղակայվել Ճավճավաձեի պողոտայում:

Թարգմանությունը՝ Տաթև Ֆռանգյանի