23.06.2026 | 13:10
Ժաննա Անդրեասյանը հետևել է «Հայոց լեզու և հայ գրականություն» առարկայի միասնական քննության ընթացքին
ՀԴԲ-ն ձերբակալել է սեպտեմբերի 11-ի նմանությամբ ահաբեկչություն ծրագրած տղամարդու
Քաղաքականություն
15.11.2024 | 16:28
ԱՄՆ Հետաքննությունների դաշնային բյուրոն (ՀԴԲ) հայտարարել է Թեխասի բնակիչ Անաս Սաիդին ձերբակալելու մասին։ Նա մեղադրվում է Իսլամական պետության անդամներին իր տունն ապաստան տրամադրելու և ահաբեկչական հարձակում նախապատրաստելու մեջ։
ՀԴԲ-ի զեկույցի համաձայն՝ նաս Սաիդը ձերբակալվել է նոյեմբերի 8-ին։ Նրա տանը և մեքենայում խուզարկություններ են կատարվել, իրավապահները զննել են նաև նրա հեռախոսը։ Associated Press-ը (AP) հաղորդում է, որ դատավարությունը սկսվել է այսօր՝ նոյեմբերի 15-ին։
Դատական փաստաթղթերում, ըստ AP-ի, ասվում է, որ Անաս Սաիդն ԻՊ-ի գործունեությունը շարունակելու կոչեր է տեսագրել: Դրանցում նա նաև նշել է, որ ցանկանում է մասնակցել 2001 թվականի սեպտեմբերի 11-ի ահաբեկչության նման հարձակմանը։
Ըստ դատախազների՝ ամբաստանյալը սովորել է պայթուցիկներ պատրաստել և բջջային հեռախոսները հեռակառավարվող պայթուցիչների վերածել: Մեղադրյալը ծրագրել էր ահաբեկչություն իրականացնել Հյուսթոն քաղաքում։ Անաս Սաիդին սպառնում է մինչև 20 տարվա ազատազրկում և 250 հազար դոլար տուգանք: Նա չի ընդունում մեղքը։
AP-ն պարզաբանում է, որ Սաիդը ծնունդով Լիբանանից է։
Թարգմանությունը՝ Տաթև Ֆռանգյանի
