22.12.2024 | 14:48
Պատգամավորները դպրոցականներին ներկայացրել են ՀՀ արտաքին քաղաքականության առաջնահերթությունները
ՌԴ-ն և Ադրբեջանը համագործակցության նոր նախաձեռնություններ են քննարկում, այդ թվում՝ նավթագազային ոլորտում
Քաղաքականություն
13.11.2024 | 21:13
Ադրբեջանն ու Ռուսաստանը համագործակցության մի շարք նոր նախաձեռնություններ են քննարկում, մասնավորապես, նավթի և գազի ոլորտում։ Այս մասին հայտարարել է Ադրբեջանի վարչապետ Ալի Ասադովը Բաքվում ՌԴ վարչապետ Միխայիլ Միշուստինի հետ հանդիպմանը, գրում է Ինտերֆաքսը։
«Կողմերի դիտարկմանն են ներկայացվել մի շարք նոր փոխշահավետ նախաձեռնություններ: Ադրբեջանը նավթի և գազի ծննդավայրն է, սա արդիական էր երեկ, այսօր և կլինի երկար ժամանակ: Իսկ Ռուսաստանն առաջատար է էներգետիկայի ոլորտում։ Այստեղ մեր փոխգործակցությունը դրականորեն է զարգանում բազմաթիվ ուղղություններով»,- ասել է Ասադովը։
Նա հիշեցրել է, որ երկրում գործում են ռուսական նավթագազային մի շարք խոշորագույն ընկերություններ։
«Ռուսաստանը մեզ համար կարևոր գործընկեր է նաև ագրոարդյունաբերական համալիրում։ Դա վերաբերում է ինչպես մեր արտադրանքի արտահանմանը, այնպես էլ ռուսական գյուղմթերքի ներմուծմանը Ադրբեջան։ 2023 թվականի վերջին Ադրբեջանից Ռուսաստան գյուղմթերքի արտահանումն աճել է ավելի քան 9%-ով, իսկ այս տարի՝ ավելի քան 12%-ով։ Ռուսաստանը նույնպես հուսալի գործընկեր է․ մենք ՌԴ-ից ներկրում ենք առնվազն 1 մլն տոննա ցորեն, իսկ 2024 թվականի 10 ամսվա վերջում այն կլինի գրեթե 900 հազար տոննա, և այդ ցուցանիշը կաճի։ Ադրբեջանը նպատակ ունի էլ ավելի ամրապնդել և ընդլայնել բարիդրացիական հարաբերությունները և փոխշահավետ համագործակցությունն ու ռազմավարական գործընկերությունը Ռուսաստանի Դաշնության հետ»,- ասել է Ասադովը։
ՌԴ վարչապետն իր հերթին նշել է, որ տրանսպորտային ենթակառուցվածքների զարգացումը երկկողմ համագործակցության կարևոր ոլորտ է։ Նա վստահեցրել է, որ բանակցություններին ներկա փոխվարչապետ Վիտալի Սավելևն ակտիվորեն ներգրավված է Հյուսիս-Հարավ միջազգային տրանսպորտային միջանցքի արևմտյան երթուղում, որն անցնում է Ադրբեջանի տարածքով։
«Դա թույլ կտա մեծացնել բեռնափոխադրումների ծավալը և ընդլայնել ապրանքային հոսքերի աշխարհագրությունը, հասնել համաշխարհային հարավի աճող շուկաներ Պարսից ծոցի և Հնդկական օվկիանոսի նավահանգիստների միջոցով, այդ թվում՝ Մերձավոր Արևելք, Հարավային և Հարավարևելյան Ասիա»,- ընդգծել է Միշուստինը։
Թարգմանությունը՝ Էմմա Չոբանյանի
