Էրդողանը Թրամփի հետ հանդիպման հույս է հայտնել և խոսել Մասկի հետ համագործակցելու ցանկության մասին

Թուրքիայի և ԱՄՆ-ի հարաբերությունների զարգացմանը նոր դարաշրջանում հնարավոր չէ հասնել հեռախոսային դիվանագիտության միջոցով։ Հույս ունենք զրուցել Դոնալդ Թրամփի հետ միջազգային կամ երկկողմ հանդիպումների ժամանակ։ Լրագրողների հետ զրույցում այս մասին ասել է Թուրքիայի նախագահ Ռեջեփ Թայիփ Էրդողանը՝ անդրադառնալով ԱՄՆ նախագահի պաշտոնում Դոնալդ Թրամփի ընտրվելուն, փոխանցում է TRT Haber-ը։

«Պետք է տեսնել, թե ինչպես կձևավորվի Թրամփի կաբինետը։ Այս պահին կարևոր են փոխնախագահներն ու արտաքին գործերի նախարարը։ Թրամփի վարչակազմը տնտեսությունը համարում է իր առաջնային նպատակներից մեկը։ Թուրքիան իր ռազմավարական աշխարհագրական դիրքով և երիտասարդ բնակչությամբ ներդրումային հնարավորություններ ընձեռող երկիր է։ Մենք կարող ենք նոր հնարավորություններ ստեղծել երկու երկրների միջև առևտրի ծավալներն ավելացնելու և ներդրումները խրախուսելու համար։ Հնարավոր է նոր համագործակցություններ զարգացնել, հատկապես՝ էներգետիկայի, ենթակառուցվածքների և տեխնոլոգիաների ոլորտներում»,- ընդգծել է Թուրքիայի նախագահը։

Միաժամանակ, նա ամերիկացի հայտնի գործարար Իլոն Մասկի հետ աշխատելու ցանկություն է հայտնել։

«Մասկն աջակցել է Թրամփին այս ընտրությունների ժամանակ, բայց մեզ համար կարևորն այն է, որ նա գործարար է, որն ակտիվորեն աշխատում է տիեզերական և տեխնոլոգիական ոլորտներում։ Տեխնոլոգիաների ոլորտում Թուրքիայի առաջընթացը գրավում է աշխարհի ուշադրությունը։ Տեխնոլոգիան այն ոլորտը չէ, որտեղ դուք կարող եք միայնակ առաջադիմել, ձեզ անպայման պետք է որոշակի համագործակցություն: Եթե ​​այս ոլորտում համագործակցության հնարավորություններ ստեղծվեն, մենք բաց ենք Մասկի հետ աշխատելու համար»,- ասել է Էրդողանը՝ հիշեցնելով, որ ՄԱԿ-ի Գլխավոր վեհաժողովի շրջանակում Նյու Յորքում հանդիպել է ամերիկացի գործարարին։

Հավելենք, որ Իլոն Մասկը՝ ԱՄՆ նորընտիր նախագահ Դոնալդ Թրամփի մերձավոր դաշնակիցը, ղեկավարելու է ԱՄՆ կառավարության նոր գործակալությունը, որը կենտրոնացած է լինելու դաշնային ծախսերի կարգավորման վրա։ Այն կոչվելու է Կառավարության արդյունավետության վարչություն (DOGE):

Թարգմանությունը՝ Էմմա Չոբանյանի