Փորձել են վրեժ լուծել Գյումրիից. Վահագն Ալեքսանյանը` «Բալասանյան դաշինք»-ի մասին․ ՏԵՍԱՆՅՈՒԹ

ՔՊ-ն ամեն ինչ անելու է, որ Գյումրիում տեղի ունենա արտահերթ ընտրություն․ լրագրողների հետ ճեպազրույցում հայտարարեց ՔՊ պատգամավոր Վահագն Ալեքսանյանը։

Ըստ նրա, կան որոշակի իրավական տարընթերցումներ, և բախվել են իրավական կազուսի, չնայած վստահ է, որ կգտնեն հնարավոր լուծումներ։ Ալեքսանյանի դիտարկմամբ՝ Գյումրիում այս պահին կառավարման ճգնաժամ է։

«Քաղաքի վիճակը մեզ շատ է անհանգստացնում։ Խստորեն դատապարտելի է «Բալասանյան դաշինք»-ի այն վարքագիծը, որ քաղաքը մատնել են անտերության, որ քաղաքային աշխատողները աշխատավարձ չեն ստանում, քաղաքը քիչ է մնում՝ աղբի մեջ կորի»,-ասաց նա։

Ըստ Ալեքսանյանի՝ մարզպետն ամեն ինչ անում է, որ քաղաքը կոլապսում չհայտնվի։ Դիտարկմանը, թե արդյո՞ք դատապարտելի չէ նաև ՔՊ-ի վարքագիծը, քանի որ ՔՊ-ն էլ է հրաժարվել կոալիցիայից՝ Ալեքսանյանը պատասխանեց, որ իրենք մանդատները վայր չեն դրել, ուղղակի աշխատել են որպես ընդդիմադիր։

Ինչ վերաբերում է ճնշումներին՝ ասաց. «Եթե իշխանությունը որոշեր ճնշեր, ապա կճնշեր այնպես, որ այդ մեծամասնություն չկազմող խմբակցությունից մի քանի հոգի ուղղակի կընտրեին ՔՊ թեկնածուին»։ Ալեքսանյանը պնդեց, որ նույնիսկ Բալասանյան դաշինքից չեն ասում, որ իրենց ճնշում են։ Դիտարկմանը, որ ասել են՝ հակադարձեց. «Եթե ասող կա՝ ստում են ուղղակի, ուղղակի դրանով իրենք փորձել են վրեժ լուծել Գյումրիից»։

Ընտրությունների անցկացման դեպքում, ըստ Ալեքսանյանի, որպես ՔՊ ցուցակի առաջին համար տեսնում են տարածքային կազմակերպությունների խորհրդի նախագահին։

Մանրամասները` տեսանյութում։