09.09.2026 | 08:46
Փաշինյանը մեկնել է Ֆրանսիա՝ մասնակցելու Միջազգային տիեզերական գագաթնաժողովին
Իշխանությունները հայտնել են Կիևի վրա վերջին 73 օրվա ընթացքում առաջին զանգվածային հարձակումը հետ մղելու մասին
Քաղաքականություն
13.11.2024 | 16:16
Ռուսաստանի զինված ուժերը վերջին 73 օրվա ընթացքում առաջին անգամ համատեղ հրթիռներով և անօդաչու թռչող սարքերով հարվածներ են հասցրել Կիևին, հայտարարել է քաղաքի ռազմական վարչակազմի ղեկավար Սերգեյ Պոպկոն, փոխանցում է BBC-ի ռուսական ծառայությունը։
Նրա խոսքով՝ հարձակմանը, ամենայն հավանականությամբ, ներգրավված են եղել թևավոր հրթիռներ, KN-23/KN-24/Իսկանդեր-Մ բալիստիկ հրթիռներ, Shahed տիպի անօդաչու թռչող սարքեր և այլ տեսակի ԱԹՍ-ներ:
Կիևում օդային տագնապը հայտարարվել է առավոտյան 7:30-ին՝ անօդաչու թռչող սարքի հարձակման վտանգի պատճառով, և այդ ժամանակ թևավոր հրթիռներն արդեն շարժվում էին դեպի Կիևի շրջան, ասվում է Պոպկոյի տելեգրամյան գրառման մեջ։
«Երբ հրթիռներն արդեն մոտենում էին Կիևին, հակառակորդը միաժամանակ բալիստիկ հարված է հասցրել մայրաքաղաքին։ Թշնամու հարձակումը կրկին ավարտվել է անօդաչու սարքերով»,- գրել է նա։
Կիևի վրա գրոհը, Պոպկոյի խոսքով, շարունակվել է ավելի քան 2 ժամ։ Ոչնչացվել է «մի քանի թևավոր, մի քանի բալիստիկ հրթիռ և մինչև 10 անօդաչու»։
Ուկրաինայի ռազմաօդային ուժերը դեռևս չեն հայտնել հարձակումը հետ մղելու մասին։ Կիևում ավերածությունների կամ զոհերի մասին տեղեկություններ չկան, հայտնել է քաղաքային ռազմական վարչակազմի ղեկավարը։
Պոպկոյի հայտարարությունից հետո Կիևում կրկին օդային հարձակման նախազգուշացում է հայտարարվել։
Ռուսաստանը պաշտոնապես չի մեկնաբանել Կիևի վրա կատարված զանգվածային հարձակումը։
Թարգմանությունը՝ Տաթև Ֆռանգյանի
